काठमाडौं। नेपाल भ्रमणमा रहनुभएका संयुक्त राष्ट्रसंघका महासचिव एन्टोनियो गुटेरेस उच्चस्तरीय भेटवार्ताका लागि सिंहदरबार पुग्नु भएको छ। सिंहदरबारमा उहाँले प्रधानमन्त्री पुष्पकमल दाहाल प्रचण्ड, उपप्रधान एवं रक्षामन्त्री पूर्णबहादुर खड्का र परराष्ट्रमन्त्री एनपी साउदसँग भेट्ने कार्यसूची रहेको छ ।

यद्यपी, गुटेरेसले सुरुमा परराष्ट्रमन्त्री साउदसँग भने भेटघाट गरिसक्नु भएको छ। उहाँलाई मन्त्रालयका सहसचिव सेवा लम्सालले स्वागत गर्नु भएको थियो। त्यस्तै गुटेरेसले आजै नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओली, राष्ट्रपति रामचन्द्र पौडेलसँग भेट्ने कार्यक्रम रहेको छ ।

यता उपप्रधान एवं गृहमन्त्री नारायणकाजी श्रेष्ठसँग आज भेटवार्ताका लागि तय भएको कार्यक्रम भने पर्सि मंगलबारका लागि सारिएको छ। नेपालको चारदिने औपचारिक भ्रमणका लागि गुटेरेस गएराति नेपाल आईपुग्नु भएको हो ।