काठमाडौं। संयुक्त राष्ट्रसंघका महासचिव एन्टोनियो गुटरेस र परराष्ट्रमन्त्री एनपी साउदबीच भेटवार्ता भएको छ। गएराति नेपाल भ्रमणमा आइपुग्नु भएका महासचिव गुटरेस र मन्त्री साउदबिच परराष्ट्र मन्त्रालयमा भेटवार्ता भएको हो।

भ्रमणको पहिलो दिन आज (आइतबार) गुटरेसले राष्ट्रपति कार्यालय पुगेर राष्ट्रपति रामचन्द्र पौडेलसँग र प्रधानमन्त्री पुष्पकमल दाहाल प्रचण्डसँग उनको कार्यालयमा शिष्टाचार भेटवार्ता गर्नुहुनेछ।

परराष्ट्र मन्त्रालयकाअनुसार गुटरेसले नेपाली कांग्रेसका सभापति शेरबहादुर देउवा र नेकपा (एमाले)का अध्यक्ष केपी शर्मा ओलीसँग सङ्घीय संसद् भवन नयाँ बानेश्वरमा बेग्लाबेग्लै शिष्टाचार भेट गर्ने कार्यतालिका छ।

त्यस्तै उपप्रधानमन्त्रीद्वय पूर्णबहादुर खड्का र नारायणकाजी श्रेष्ठसँग पनि महासचिव गुटरेसले भेटवार्ता गर्ने तालिका तय गरिएको छ।