काठमाडौं । नेपालमा कूटनीति किचलो बढ्दै गएपछि प्रतिनिधि सभाअन्तर्गतको अन्तर्राष्ट्रिय सम्बन्ध र पर्यटन समितिले परराष्ट्रमन्त्री एनपी साउदलाई समितिको बैठकमा बोलाएको छ ।
प्रधानमन्त्री प्रचण्डको चीन भ्रमण, चीनले जारी गरेको नक्सामा राखेको नेपालको नक्सा, नयाँ नक्साको बारेमा परराष्ट्र मन्त्री र पूर्व परराष्ट्रमन्त्रीबीच बाझिएको कुरालगायतको विषयमा छलफल गर्नका लागि परराष्ट्रमन्त्रीलाई बोलाइएको समितिका सभापति राजकिशोर यादवले बताउनुभयो ।
समितिबाट परराष्ट्र मन्त्रालयलाई खबर गएको छ, भोली ११ बजेका लागि बैठक बोलाइएको उहाँले बताउनुभयो ।
पछिल्लो समय चीनले आफ्नो नयाँ नक्सा जारी गर्ने क्रममा नेपाले संसदबाट संशोधन गरेको नयाँ नक्सामा राखिएको भूभागलाई हटाएर आफ्नो नक्सा जारी गरेपछि त्यसको विरोध भइरहेको छ ।
तत्कालीन परराष्ट्रमन्त्री प्रदीप कुमार ज्ञवालीले नेपालको संसदबाट नयाँ नक्सा जारी भए लगत्तै सबै मुलुकलाई जानकारी गराएको बताउनुभएको थियो । तर वर्तमान परराष्ट्रमन्त्री साउदले मन्त्रालयको सम्बन्धित शाखामा बुझ्दा उक्त जानकारी गराएको नपाइएको बताउनुभएको छ ।
यस्तै गएको शनिबार चिनियाँ राजदूत छेन सोङले अर्को छिमेकी मुलुक भारतसँगको व्यापारिक सम्बन्धलाई लिएर दिएको अभिव्यक्ति विवादास्पद भइरहेको छ । त्यस विषयमा पनि समितिमा बोलाएर परराष्ट्र मन्त्रालयसँग जानकारी लिने संसद्को अन्तर्राष्ट्रिय सम्बन्ध तथा पर्यटन समितिले निर्णय गरेको हो ।
