काठमाडौं । नेकपा माओवादी केन्द्रका नेता रामनारायण बिडारीले सुन तस्करीको अनुसन्धानका लागि उच्चस्तरीय छानबिन समिति आवश्यकै नभएको बताउनुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै उहाँले उच्चस्तरीय छानबिन समिति बनेपछि सुन तस्करीको जाँचबुझ, छानबिन र अनुसन्धानमा प्रतिकूल प्रभाव पर्न सक्ने र सीआईबीलाई डिस्टर्ब हुने भएकाले शीर्ष नेताहरुले संसद् खुलाउनको लागि सहमति गरे पनि यसको आवश्यकता नरहेको स्प्ष्ट पार्नुभयो ।

सीआईबीले अनुसन्धान गर्दा आफ्ना मान्छे पक्राउ पर्ने भएकाले एमालेले पन्छाउन खोजेको आरोप लगाउँदै नेता बिडारीले आयोगले अनुसन्धानका नाममा वर्षदिनमा प्रतिवेदन दिने र थन्किएर सुन तस्करी काण्ड नै ओझेल परेपछि एमालेका नेताहरु खुशी हुने भन्दै व्यङग्य गर्नुभयो ।

यस्तै, अर्को प्रसंगमा नेता बिडारीले कोसी प्रदेशमा सरकार टिकाउने कुनै उपाय नभएकाले अध्यक्षता गरेको सांसदले मतदान गर्नुपरेको बताउनुभयो ।