२०८३, कार्तिक २० गते
- यो साता चर्चामा :
काठमाडौं । नेपाल कम्युनिस्ट पार्टी (नेकपा) प्रदेश –५ को संसदीय दलको बैठकले आफ्ना सांसदहरुलाई ह्विप जारी गर्ने निर्णय गरेको छ । शुक्रबार प्रदेशसभामा पेस भएको प्रदेशको स्थायी राजधानी र नामकरणसम्बन्धि प्रस्तावको पक्षमा मतदान गर्ने निर्णय गरेको हो ।
मुख्यमन्त्री शंकर पोखरेलसहितको बैठक डिभिजन सडक कार्यालय परिसरमा कबिर ६ घण्टा चलेको थियो ।
नेकपाले आफ्ना प्रदेशसभा सदस्यहरुलाई प्रस्तावको पक्षमा मतदान गर्न ह्विप जारी गर्ने भएपछि नाम र स्थायी राजधानीको प्रस्ताव स्वीकृत हुने देखिएको हो ।
प्रदेश सरकारले प्रदेश राजधानी दाडको देउखुरीमा बनाउने र नाम लुम्बिनी राख्ने प्रस्ताव प्रदेश सभामा लगेको थियो । आज बिहानैबाट बसेको संसदीय दलको बैठकले सरकारले ल्याएको प्रस्तावको पक्षमा मतदान गर्ने निर्णय गरेको प्रदेश सांसद भोजप्रसाद श्रेष्ठले बताउनुभयो ।
उहाँले सबै जिल्लाका सांसदहरुले आफ्नो धारणा राखेको र लामो समयको छलफलपछि सरकारले ल्याएको निर्णयलाई समर्थन गर्ने निष्कर्षमा पुगिएको बताउनुभयो ।
बैठकमा मुख्यमन्त्री पोखरेलले प्रस्तावका पक्षमा एकमत हुन र मतदान गर्न सांसदहरुलाई निर्देशन दिनुभएको छ ।
प्रदेश ५ मा प्रदेश राजधानी रुपन्देही बनाउने कि दाङ भन्ने विषयमा पहिलेदेखि नै विवाद हुँदै आएको थियो । प्रदेश सभाको आगामि बैठक असोज १९ गते सोमबार मध्याह्न १२ बजे बोलाइएको छ ।
सांसदले आफ्ना धारणा राखेपछि मुख्यमन्त्री पोखरेलले प्रस्तावबारे थप प्रस्ट पार्ने सहमतिअनुसार प्रस्ताव पास गर्न निर्देशन दिएको बताइएको छ ।
प्रदेशसभामा पेस भएको प्रस्ताव पास गर्न दुई–तिहाइ बहुुमत आवश्यक हुन्छ । प्रदेश –५ मा नेकपाका ६१, विपक्षी नेपाली कांग्रेसका १९, मधेसकेन्द्रित दलका ६, राष्ट्रिय जनमोर्चाका १ सहित ८७ जना सांसद रहेका छन् ।
