काठमाडौं । मन्त्रीपरिषद् पुनर्गठन गर्ने चर्चासँगै मन्त्रालयहरुको काममा प्रत्यक्ष असर पर्न थालेको छ । अधिकांश मन्त्री परिवर्तन हुने संभावना देखिएपछि मन्त्रीहरुले व्यक्तिगत लाभ र स्वार्थ केन्द्रीत कामहरुलाई प्राथमिकतामा पारेको पाइएको छ ।

उनीहरुले भित्र भित्र हतार हतार गरिरहेका कामहरु गोप्य तरिकाले गरिरहेकाले अहिले बाहिर सार्वजनिक नभएपनि धेरै काम भएको मन्त्रालयका कर्मचारीहरुले बताएका छन् ।

विषेशगरेर मन्त्री र उनको सहयोगी तथा सचिवालयका व्यक्तिहरुको सक्रियता र छटपटी अत्यधिक धेरै देखिएको कर्मचारीहरुको भनाई छ ।
मन्त्री तथा उनका सहयोगीहरु सक्रिय भएपनि कर्मचारीहरु भने पहिलाभन्दा निक्रिय भएका छन् ।

कर्मचारीहरुले मन्त्री फेरिने भएपछि आलटाल गर्ने, असहयोग गर्ने र पहिलाजस्तो नजिक हुन छाडेको एक मन्त्रीका सहयोगीले जानकारी दिए ।
उनका अनुसार अहिले कर्मचारीहरुले मन्त्रीहरुलाई अनेक बहना बनाएर टाढीने गरेका छन् ।

तर कर्मचारीहरुले भने जाने बेलामा मन्त्रीहरुले गलत फाइलमा हस्ताक्षर गराउने संभावना रहेकाले टाढीनु परेको बताउने गरेका छन् ।
कतिपयले भने यही बेलामा कार्यान्वयन गर्नु नपर्ने वा नसकिने लोकप्रिय कार्यक्रमहरु घोषणा गर्ने प्रयास पनि गरेको कर्मचारीहरुले बताएका छन् ।
प्रधानमन्त्री केपी शर्मा ओलीले अधिकांश मन्त्रीहरु परिवर्तन हुने संकेत मन्त्रीपरिषद्को बैठकमै गरेको दिनदेखि मन्त्री र सहयोगीहरुको सक्रियता बढेको हो ।

मन्त्रीपरिषद् पुनर्गठनका लागि सत्तारुढ दल नेकपाले प्रधानमन्त्री ओली र नेकपाका अर्का अध्यक्ष पुष्पकमल दाहाल प्रचण्डलाई जिम्मेबारी दिएको छ । उहाँहरुले केहीदिन देखि मन्त्रीमपरिषद् पुनर्गठनकै विषयमा छलफल गरिरहेपनि निश्कर्षमा नपुगेको अझै केही दिन भने लाग्ने देखिएको छ ।