२०८३, श्रावण १० गते
- यो साता चर्चामा :
काठमाडौं । पार्टी (नेपाली कांग्रेस) सभापति शेरबहादुर देउवालाई बुझाउन वरिष्ठ नेता रामचन्द्र पौडेल समूहले तयार पारेको विरोध पत्रमा कृष्ण सिटौला समूहले हस्ताक्षर गर्न अस्वीकार गरेको छ ।
समायोजन, क्रियाशील सदस्यता, विभागहरु गठन, भातृ तथा शुभेच्छुक संस्थाको मुद्दा उठाएर पौडेल समूहले विरोधपत्र बनाएको छ, जसमा महामन्त्री शशांक कोइराला र कोषध्यक्ष सीतादेवी यादवसहित २७ केन्द्रीय सदस्यले हस्ताक्षर गरेका छन् ।
विरोधपत्रमा सिटौला समूहको पनि हस्ताक्षर लिने पौडेल समूहको प्रयास थियो । आज विहान आफ्नै निवास बोहोराटारमा भएको भेटमा वरिष्ठ नेता पौडेलले विरोधपत्रमा हस्ताक्षर गर्न सिटौलालाई आग्रह गर्नुभएको थियो ।
तर सिटौलाले आफ्नो समूहले हस्ताक्षर नगर्ने बताउनुभएको हो । मुद्दाका आधारमा आफ्नो समर्थन र विरोध हुने भन्दै उहाँले पौडेल समूहले उठाएको मुद्दाहरुमा आसन्न केन्द्रीय कार्यसमितिमा आफ्नो धारणा राख्ने बताउनुभएको छ ।
