काठमाडौं । नक्कली भुटानी शरणार्थी प्रकरणको मुद्धालाई कमजोर पार्न खोजिएको भन्दै चौतर्फी आलोचना शुरु भएको छ । प्रतिवादीको पक्षमा बारका अध्यक्षलगायतको समूह बहसमा उत्रिएपछि अभियुक्तलाई छुट्कारा दिने रणनीति शुरु गरिएको भन्दै आलोचना भएको हो । आजको बहसमा पूर्वमहान्यायाधिवक्ताद्वय खम्बहादुर खाती र रमणकुमार श्रेष्ठले नक्कली भुटानी शरणार्थी प्रकरणमा पूर्वगृहमन्त्री बालकृष्ण खाणलगायतलाई हचुवाको भरमा मुद्दा लगाइएको जिकिर गर्नुभएको थियो । सरकारी वकिलहरुमाथि आक्रोशित द्वयले कसुर ठहरिने कुनै प्रमाणविनै कसैले बयानमा पोलेको आधारमा अदालतमा मुद्दा थोपरेको तर्क गर्नुभएको थियो । नेपाल बार एशोसियसनका अध्यक्ष गोपालकृष्ण घिमिरेले कानून व्यवसायीको धर्मनै वादी, प्रतिवादीका पक्षबाट बहस गर्नु रहेको भन्दै यो विषयमा टिप्पणी आवश्यक नरहेको बताउनुभयो ।

फासीको सजाय भएका मुलुकहरुमा समेत वादी, प्रतिवादी वकिलहरुले आफ्नो भूमिका फेर्नसक्ने बताउँदै घिमिरेले आफूहरुमाथि लागेको आरोपको खण्डन गर्नुभयो । कुनैपनि मुद्धामा अभियुक्त ठहर भएकाहरुले आफ्नो भनाइ सहज रुपमा राख्न पाउनुपर्ने उहाँको जिकिर रहेको छ ।

यसअघि घिमिरेले पूर्वगृहमन्त्री खाणलाई फसाउन नै प्रहरीले आफैं प्रमाण खडा गरेको दाबी गर्नुभएको थियो । सचिव टेकनारायण पाण्डेले समेत प्रहरीले दबाब दिएर बयान गर्न लगाएर खाणको नाम मुछ्न लगाइएको बताएपछि खाणमाथिको आरोप निराधर रहेको घिमिरेको भनाइ छ ।
उता, मुद्धा कमजोर पार्ने प्रपञ्च चलिरहेको आरोप लागेका बेला भ्रष्टाचार गर्नेलाई कुनै हालतमा नछोडिने प्रधानमन्त्री पुष्पकमल दाहाल प्रचण्डले बताउनुभयो । यो बेला आफ्नो अन्तिम परिक्षण भएकोले पनि पार्टीको समेत ईज्जत जोडिएको प्रचण्डको जिकिर छ ।

राज्य संयन्त्रलाई नै दुरुपयोग गरी आफ्नै नागरिकलाई अनागरिक बनाउने जो कोहीलाई पनि छोड्न नहुने सर्वसाधारणहरुको दबाब छ । यदि त्यो प्रकरणमा भीभीआईपी भनिनेहरुको संलग्नता नदेखिएको भए को संलग्न रहे त दुधको दुध पानीको पानी प्रष्ट हुन जरुरी देखिन्छ । मुद्धालाई नै कमजोर पारेर विश्वमाझ नेपालीको बदनाम गर्ने छुट कसैलाई पनि छैन । नेपाल प्रहरीको अनुसन्धान र जिल्ला अदालत काठमाडौंको थुनछेक बहसमा कसैको दबाब र प्रभाव नमिसियोस् ।।
यसैबीच, भुटानी शरणार्थी प्रकरणमा आज पूर्वगृहमन्त्री खाण, नेपाल हज समितिका अध्यक्ष शमशेर मियाँ र पूर्व सभासद् आङटावा शेर्पाको तर्फबाट बहस भएको छ । आज प्रतिवादीको तर्फबाट बहस सक्न न्यायाधीश प्रेमप्रसाद न्यौपानेले समय दिएपनि बहस पुरा भएन । प्रतिवादीहरू हरिभक्त महर्जन, लक्ष्मी महर्जन र शरणार्थी नेता टेकनाथ रिजालको तर्फबाट भोलि थुनछेक बहस हुने भएको छ ।