काठमाडौं । शिक्षा, विज्ञान तथा प्रविधिमन्त्री गिरिराजमणि पोखरेलले सरकारले प्रविधिमैत्री ढंगले कक्षा र परीक्षा सञ्चालन गर्न बाटो खुला गरेको बताउनुभएको छ ।

संकटको वेला सिकाइलाई अवरुद्ध पार्ननहुने, वैकल्पिक पद्धतिबाट भएपनि सिकाइ र सिर्जनात्मक अभ्यासलाई निरन्तरता दिनुपर्ने, यसका लागि संघले मात्रै नभएर प्रदेश र स्थानीय तहले पनि सहजीकरण गरेको उहाँको भनाई छ ।

नेपाल विज्ञान तथा प्रविधि प्रज्ञा प्रतिष्ठान (नाष्ट)ले गरेको ‘युवा वैज्ञानिक फोरम’ घोषणा कार्यक्रममा बोल्दै मन्त्री पोखरेलले देशभरका ६ सय ३७ वटा स्थानीय तहमा प्राविधिक शिक्षालय स्थापना भइसकेका बताउनुभयो ।

मन्त्री पोखरेलले सरकारले विज्ञान प्रविधि तथा नवप्रवर्तन नीति नै जारी गरिसकेको र कार्ययोजना बनाएर काम गरिरहेको बताउनुभयो । सरकारले ‘स्मार्ट नाष्ट’को अवधारणामा नाष्टअन्तर्गत सातै प्रदेशमा अनुसन्धान केन्द्र स्थापना गर्ने योजना रहेको उहाँले बताउनुभयो ।