काठमाडौं । प्रधानमन्त्री पुष्पकमल दाहाल ‘प्रचण्ड’ पहिलो औपचारिक भ्रमणको रूपमा भारत जाने तय भएपनि हालसम्म भ्रमणको मिति भने तय हुन सकेको छैन ।

भारतले प्रधानमन्त्री प्रचण्डलाई स्वागतको तयारी थालिसकेको छ । प्रधानमन्त्री प्रचण्डले पनि भारतको भ्रमण चाँडै गर्ने भनेर खबर पठाए पनि मिति भने भन्नुभएको छैन। अहिले भारत सोही मितिको पर्खाइमा रहेको छ ।

नेपालस्थित भारतीय दूतावासका एक अधिकारका अनुसार प्रधानमन्त्री प्रचण्डले भारतको भ्रमण गर्ने खबर पठाएसँगै तयारी थालिसकिएको छ ।

राष्ट्रपति र उपराष्ट्रपतिको चुनाव सकिएको छ । चैत ६ गते प्रधानमन्त्री प्रचण्डले संसद्मा विश्वासको मत लिनुहुनेछ । विश्वासको मत लिइसकेपछि केन्द्रमा सरकार विस्तार गर्नुका साथै प्रदेशहरूमा सत्ता समीकरण मिलाउने प्रचण्डको योजना रहेको छ ।

त्यसअघि भ्रमणका लागि सबै तयारी पुरा गर्ने काम अगाडि बढेको छ । भ्रमणबारे परराष्ट्र मन्त्रालय र नेपालस्थित भारतीय दूतावासले यसबारे होमवर्क गरिरहेको छ ।

अप्रिलको दोस्रो अथवा तेस्रो हप्तामा भ्रमण हुने बताइएको छ । प्रधानमन्त्री प्रचण्डका निजी सचिवालयका एक सदस्यका अनुसार भारत भ्रमण जाने लगभग निश्चित भएको छ, तर यहाँ केही राजनीतिक ‘सेटल’ गरेर मात्र जाने तयारी प्रचण्डको छ ।