काठमाडौं । नेपाली काँग्रेसमा संस्थापन पक्षले गरिरहेको नियुक्ति कुनैपनि हालतमा फिर्ता नहुने सभापति शेरबहादुर देउवा पक्षीय नेताहरुले दावी गरेका छन् ।

काँग्रेसका विभागहरुमा भएको नियुक्ति फिर्ता गर्नका लागि नगरिएको र केही आधार तयार भएर नै देउवाले नियुक्ति दिएको उनीहरुले तर्क गरेका छन् ।

सहमतीमै नियुक्त गर्न खोज्दा खोज्दै पनि सभापति देउवालाई असफल पार्ने नियतले यसअघि नियुक्त गर्न नदिएकाले उहाँले अहिले बाध्य भएर नियुक्त गरेको केन्द्रीय सदस्य सुरेन्द्र पाण्डेले बताउनुभयो ।

देउवाले गरेका नियुक्ति अवैधानिक र अराजनीतिक भएकोभन्दै असन्तुष्ट पक्षले अनसनलगायतका आन्दोलनको तयारी गरिरहेका बेला उहाँले कुनै पनि आन्दोलनले नियुक्ति फिर्ता नहुने दावी गर्नुभयो ।

अहिले असन्तुष्ट देखिएको पक्ष नै सहभागी भएर विगतमा सहमतीका नाममा अवैधानिक धेरै कामहरु भएकाले अहिले उनीहरुले वैधानिकताको प्रश्न उठान नसुहाउने नेता पाण्डेको टिप्पणी छ ।

“स्वार्थ मिल्यो भन्दैमा विगतमा उहाँहरुले विधान नमिचेको र विधानको विपक्षमा जान कहिल्यै पनि नमानेको भए सभापतिले अहिले यस्तो आँट गर्नुहुन्थ्येन, तर विधानको कुरा उठाउने नैतिकता उहाँहरुले धेरै पहिले नै गुमाईसक्नु भएको छ,” पाण्डेले भन्नुभयो ।

उहाँले सभापति देउवाका विरुद्धमा आन्दोलन गरेर कसैलाई हित नहुने र महाधिवेशनको वातावरण बनाउने तर्फ लाग्नु उपयुक्त हुने सुझाव पनि दिनुभयो ।