काठमाडौं । नेपाली कांग्रेसका महामन्त्री गगनकुमार थापाले आफूलाई सांसदमा निर्वाचन गराएर पठाए १० वर्षमा मुलुकको राजनीतिलाई पूरै सुधार गर्ने प्रतिवद्धता व्यक्त गर्नुभएको छ । उहाँले पार्टीमा नेतृत्व परिवर्तनका लागि आफूलाई संसदमा निर्वाचित गरेर पठाउनुपर्ने धारणा राख्नुभयो ।

कांग्रेसको काभ्रे–काठमाडौं सम्पर्क समन्वय समितिले आज आयोजना गरेको भेटघाट कार्यक्रममा उहाँले यस्तो बताउनुभएको हो । उहाँले आफूहरुले बहुमत ल्याउन चाहेको बताउनुभयो । उहाँले मंसिर ४ गतेको निर्वाचनपछि पनि मतदाताको प्रतिष्ठा राख्ने काम सांसदहरुले नगरे मुलुकमा संघीय लोकतान्त्रिक गणतन्त्रात्मक शासन व्यवस्थानै नरहने चेतावनी समेत दिनुभएको छ ।

थापाले आगामी निर्वाचनमा आफूलाई प्रधानमन्त्रीको दाबेदारको रुपमा प्रस्तुत गर्नुभएको छ । राजनीतिमा युवाहरुको जबरजस्त हस्तक्षेप हुनुपर्ने बताउँदै आउनुभएका थापाले यसपटक भने आफूलाई प्रधानमन्त्रीकै उम्मेदवारको रुपमा अघि बढाउनुभएको छ ।