काठमाडौँ । बीमा समिति आजदेखि प्राधिकरणमा परिणत भएको छ। बीमा ऐन, २०७९ बमोजिम बीमा समिति आजदेखि ‘नेपाल बीमा प्राधिकरण’ मा परिणत भइ औपचारिक रूपमै प्राधिकरणले काम सुरु गरेको छ।

नेपालको संविधान, २०७२ बमोजिम सङ्घीय संसद्बाट बनेको बीमा ऐन, २०७९ को व्यवस्थाबाट प्राधिकरणमा परिणत भएको घोषणा गर्दै प्राधिकरणका अध्यक्ष सूर्यप्रसाद सिलवालले यसअघि नेपालको बीमा नियमनकारी निकायका रूपमा बीमा समितिबाट भएका सम्पूर्ण काम कारबाहीहरू अबदेखि नेपाल बीमा प्राधिकरणबाट हुने जानकारी दिनुभयो ।

उहाँले बीमा ऐन, २०७९ जारी भएसँगै नेपाल बीमा प्राधिकरण थप स्वायत्त हुने जानकारी दिनुभयो। गत असोज २३ गते राष्ट्रपति विद्यादेवी भण्डारीबाट बीमा ऐन, २०७९ स्वीकृत भएको थियो ।