काठमाडौँ । बाग्मती प्रदेशका भौतिक पुर्वाधार विकासमन्त्री रामेश्वर फुयालले प्रदेश सभा र संसदीय दलभित्र मुख्यमन्त्री डोरमणि पौडेलको राजीनामा नमागिएको बताउनुभएको छ ।

उहाँले राजनीतिमा कसैको राजीनामा माग्ने कुरा त्यस्तो गम्भिर विषय नबन्ने र संसद तथा पार्टीको संसदीय दलमा कसैले पनि राजीनामाको विषय नउठाएको भन्दै मुख्यमन्त्री पौडेलको बचाउन गर्नुभएको छ ।

हेटौंडामा चार दिनसम्म सञ्चालन भएको नेकपा संसदीय दलको बैठकमा प्रदेश सरकारको गतिविधिप्रति असन्तुष्टि पोख्दै सांसदहरुले संसदीय दलका नेतासमेत रहेका मुख्यमन्त्री पौडेलको राजीनामा माग गरेका थिए ।

नेपाली रेडियो नेटवर्कसंग कुरागर्दै मन्त्री फुयालले बैठकमा सांसदहरुले सरकार सञ्चालन, बजेट कार्यान्वयनको प्रभावकारिता र आगामी आर्थिक वर्षको बजेटमा प्रश्न उठाएको बताउनुभयो ।

विशेष गरी पूर्वमाओवादी निकट तथा तत्कालीन एमाले निकट माधव नेपाल पक्षधरका सांसद्हरुले पौडेलेको राजीनामा मागेका थिए । मन्त्री फुयालले कोरोनाका कारण जनताको अपेक्षाअनुसार विकास निर्माणको काम पूरा नभएको सत्य भएपनि पौडेलको राजीनामाको कुरा आधिकारिक रुपमा नउठेको बताउनुभयो ।

उहाँले पार्टीको घोषणापत्रअनुसार समाजवादउन्मुख बजेट निर्माणमा सरकार सफल भएको दावीगर्दै बैठकमा बजेटमा छुटेका विषयलाई समेटेर लैजाने प्रतिबद्धता व्यक्त गरिएको जानकारी दिनुभयो ।

संसदीय दलको बैठकमा मुख्यमन्त्री तथा मन्त्रीहरुप्रति लगातार प्रश्न खडा भएपछि त्यसको समाधान र संसदीय दललाई सुझाव दिनका लागि पाँच सदस्यीय समिति निर्माण गरिएको नभई सरकारलाई आगामी दिनमा आउने समस्याका विषयमा सुझाव दिन समिति बनाइएको फुयालको भनाई छ ।