काठमाडौं । प्रमुख विपक्षी दल नेपाली कांग्रेसले कालीकोटको तिलागुफा नगरपालिका १, नाग्मका पहिरोपीडित परिवारलाई तत्काल राहत र घाइतेको उपचारको व्यवस्था गर्न सरकारसँग माग गरेको छ ।

कांग्रेस केन्द्रीय कार्यालयका मुख्यसचिव कृष्णप्रसाद पौडेलले आज प्रेस विज्ञप्ति जारी गरेर नाग्माका पहिरोपीडित परिवारलाई राहत र स्वास्थ्य उपचारका व्यवस्था गर्न सरकारसँग माग गर्नुभएको हो ।

कांग्रेसले घटनाप्रति दुःख व्यक्त गर्दै पीडितहरुको संवेदनशीलताप्रति सहानुभूति पनि प्रकट गरेको छ । नाग्मामा हिजो दिउँसो गएको पहिरोमा पुरिएर एकै परिवारका चारसहित १० जनाको मृत्यु भएको थियो । पहिरोमा पुरिएर केही व्यक्ति घाइते भएका छन् भने दुई जना अझै बेपत्ता छन् ।