काठमाडौँ – व्यवस्थापनको नाममा रोजगारीबाट हटाएको भन्दै कान्तिपुर टेलिभिजनविरुद्ध कर्मचारीहरुले आन्दोलनको घोषणा गरेका छन् । कान्तिपुर टेलिभिजन कर्मचारी संघले आज एक विज्ञप्ति जारी गर्दै अन्यायपूर्ण ढंगले जागिरबाट निकाल्ने निर्णयविरुद्ध आन्दोलनका कार्यक्रम घोषणा गरिएको जानकारी दिएको छ ।

आन्दोलनका कार्यक्रमअन्तर्गत यही भदौ १६ गते विरोधस्वरुप सामाजिक सञ्जालमा कालो ब्यानर टाँस्ने, १८ गते कान्तिपुरका देशैभरीका कर्मचारी तथा पत्रकारहरुले एकदिन कालोपट्टी बाँधेर काम गर्ने र २१ गते आ–आफ्नो कार्यक्षेत्रमा एक घन्टा अवरोध गर्ने रहेको छ ।

अध्यक्ष निर्मला बस्नेतले जारी गरेको विज्ञप्तिमा भनिएको छ, ‘यसपछि पनि सुनुवाइ नभए दोस्रो चरणका आन्दोलनका कार्यक्रम घोषणा गरिने छ ।’

कान्तिपुर टेलिभिजन कर्मचारी संघका कार्यवाहक महासचिव राजन तामाङ, केन्द्रीय सदस्य प्रकाश थापा र रवीन्द्रध्वज शाहलाई एचआर प्रमुख र स्टेसन म्यानेजरबाट धम्कीपूर्ण भाषामा रोजगारीबाट निष्काशन भएको र अरु कर्मचारीलाई पनि भेदभावपूर्ण रुपमा नामावली तयारगरी रोजगारीबाट हटाउने भन्दै मौखिक जानकारी गराइएकोप्रति संघले कडा आपत्ति प्रकट गरेको छ ।