काठमाडौं । सत्याग्रही एवं सरकारी बेथितिविरुद्धका अभियन्ता डा. गोबिन्द केसीमाथि राज्यले देखाएको व्यवहारलाई नेपाल विद्यार्थी संघ (नेविसंघ)ले अतिवादको पराकाष्टाको संज्ञा दिएको छ । आज विज्ञप्ति जारी गर्दै नेविसंघले यस्तो बताएको हो ।

डा. केसीमाथि सरकारले देखाएको व्यवहार अत्यन्त निकृष्ट र आपत्तिजनक रहेको बताउँदै यसप्रति आफ्नो ध्यानाकर्षण भएको जनाएको छ ।

‘निरन्तर निमुखा र सर्बसाधारण जनताको सेवामा तल्लिन रहँदै स्वास्थ्य र शिक्षामा रहेको विकृति र विसंगतिकाविरुद्धको एक अथक अभियन्ता डा केसीलाई उहाँ बसेको स्थलबाट बाहिर जान नदिन प्रहरी र सशस्त्र प्रहरी लगाएर बलपूर्वक रोक्नु अतिवादको पराकाष्ठा हो’, विज्ञप्तिमा भनिएको छ ।

लामो समयदेखि चिकित्सा शिक्षा सुधारको माग राख्दै आएका वरिष्ठ चिकित्सक डा. केसी बिहीबार जुम्लामा प्रहरीको घेराबन्दीमा परेका थिए ।
त्रिवि शिक्षण अस्पतालबाट सेवानिवृत्त भएपछि कर्णालीका दुर्गम क्षेत्रमा निःशुल्क उपचार गर्दै हिंडेका उनलाई विहीबार प्रहरीले घरोबन्दीमा हालेर अनावश्यक दुःख दिएको थियो ।