काठमाडौं । जनता समाजवादी पार्टी जसपामा दुई जना अध्यक्ष राख्नुपर्ने विषयमा शुरु भएको विवाद पुनः बल्झिएको छ । निर्वाचनअघि शुरु भएको विवाद चुनाव सकिएलगत्तै असार १ र २ गते विधान अधिवेशन बोलाउने र विधान अधिवेशनबाट विधान संशोधन गर्ने सहमति भएपछि केही मत्थर भएको थियो ।

असार आउनै लाग्दा विवाद शुरु हुन थालेको हो । जसपामा अब दुईजना अध्यक्ष रहने नसक्ने भन्दै पार्टी अध्यक्ष उपेन्द्र यादवले आफ्नो अडान कायम राखेपछि विवाद चर्किएको छ । तत्कालीन समयमा महन्थ ठाकूरका लागि सिर्जना गरिएको अध्यक्ष पद कसैले पनि नपाउने यादवको भनाइ छ ।

अध्यक्ष यादवले पार्टीको महाधिवेशनले गर्ने निर्णयलाई स्वीकार्न सक्ने बताउँदै लोकतान्त्रिक समाजवादी पार्टी एकताका लागि तयार भएमा मात्रै अध्यक्ष उसलाई दिन सकिने बताउनुभयो ।

डा. बाबुराम भट्टराई निकट जसपाका कार्यकारिणी सदस्य प्रशान्त सिंहले विधानमा दुई अध्यक्ष राख्ने व्यवस्था रहेको र त्यसलाई कार्यान्वयन गर्दा उपेन्द्र यादवलाई समेत सहज हुने बताउनुभयो । अध्यक्ष यादव एकलौटी अगाडि बढ्न खोजे पार्टी दुर्घटनामा जानसक्ने उहाँको चेतावनी छ ।

गत साल भदौमा महन्थ ठाकुरले जसपा छाडेर लोकतान्त्रिक समाजवादी पार्टी लोसपा गठन गरेपछि उहाँले ओगटेको अध्यक्ष पद खाली छ । खाली भएको पहिलो अध्यक्षमा डा. बाबुराम भट्टराईलाई राख्नुपर्ने र अशोक राईलाई संघीय परिषद्को अध्यक्ष बनाउनु पार्टीमा दबाब बढेको छ ।

गत फागुनमा बसेको केन्द्रीय समितिको बैठकले असार १ र २ गते विधान अविधेशन बोलाउने निर्णय गरेको थियो । यादव निकट नेताहरु भर्खरै चुनाव सकिएको र आर्थिक स्थितिको कारण पनि तत्काल विधान अधिवेशन बोलाउन सकिने अवस्था नभएको बताउँछन् ।