काठमाडौं । वर्तमान सरकारमा सहभागी हुने निश्चित भएसँगै लोकतान्त्रिक समाजवादी पार्टी (लोसपा) नेपालले गैर सांसदलाई मन्त्री पठाउने तयारी गरेको छ ।

कसलाई मन्त्री पठाउने विषयमा आन्तरिक छलफल चलिरहेको बेला अध्यक्ष महन्थ ठाकुरले गैरसांसदलाई सरकारमा पठाउने प्रस्ताव गरेको लोसपा स्रोतले बताएको छ ।

यद्यपि, अधिकांश सांसद तथा नेताहरू अध्यक्ष ठाकुरको प्रस्तावको विपक्षमा रहेका छन् । कार्यकारिणी सदस्य एवं सांसदहरू शरतसिंह भण्डारी, अनिलकुमार झा, लक्ष्मणलाल कर्ण, उमाशंकर अरगरिया, विमल श्रीवास्तवलगायत नेताहरू पार्टीका सांसदहरू मध्येबाट नै मन्त्रीमा जानुपर्ने पक्षमा छन् ।

शीर्ष नेताहरू चुनावको तयारीमा लाग्नुपर्ने भएकाले सांसद र शीर्ष नेतालाई मन्त्रीमा नपठाउने तथा सरकारमा जानै पर्ने भए गैरसांसदलाई पठाउने अध्यक्ष ठाकुरको प्रस्ताव रहेको छ । स्रोतका अनुसार प्रधानमन्त्री देउवा लोसपालाई दुईवटा मन्त्री दिन तयार भएका छन् । लोसपाले भने चारवटा मन्त्रालय दाबी गरेको थियो ।

तर लोसपाका कार्यकारिणी सदस्य उमाशंकर अरगरियाले सरकारमा जाने विषयमा हालसम्म कुनै निर्णय नभएको बताउँनुभयो । उहाँले भन्नुभयो, ‘प्रधानमन्त्री देउवासँगको भेटमा हाम्रो पाटीका अध्यक्षले सरकारको विषयमा कुनै कुराकानी गर्नुभएको छैन, यता पार्टीमा पनि कुनै छलफल छैन ।’ ​

लोसपाले आफ्नो माग पुरा गराउनका लागि भोलि प्रधानमन्त्री देउवालाई ज्ञापनपत्र बुझाउन लागेको बताउँदै नेता अरगरियाले आफूहरुको माग पूरा भए मात्र सरकारको विषयमा छलफल हुने बताउनुभयो ।