काठमाडौं । सत्तारुढ नेपाल कम्युनिस्ट पार्टी (नेकपा)को सचिवालयले अध्यक्षद्वयले बनाएको कार्यदललाई अनुमोदन गरेको छ ।

अध्यक्ष केपी शर्मा ओली र अर्का अध्यक्ष प्रचण्डले पार्टीमा देखिएको विवाद समाधानका लागि महासचिव विष्णु पौडेलको नेतृत्वमा कार्यदल बनाएको थियो ।

तर वरिष्ठ नेता माधवकुमार नेपाल, झलनाथ खनाल र नारायणकाजी श्रेष्ठले सचिवालयबाट गठन वा अनुमोदन गर्नुपर्ने बताएपछि आज सचिवालय बैठक मार्फत वैधानिकता प्रदान गरिएको हो ।

सचिवालय बैठकले कार्यदललाई अनुमोदन गरेको प्रवक्ता नारायणकाजी श्रेष्ठले जानकारी दिनुभयो । महासचिव विष्णु पौडेल संयोजकत्वको कार्यदलमा भीम रावल, शंकर पोखरेल, सुरेन्द्र पाण्डे, जनार्दन शर्मा र पम्फा भुसाल सदस्य छन् ।

असार १० गते सुरु भएको स्थायी कमिटी बैठकमा बहुमत सदस्यहरुले ओलीले प्रधानमन्त्री र पार्टी अध्यक्ष दुवै पदबाट राजीनामा दिनुपर्छ भनेपछि विवाद उत्कर्षमा पुगेको हो ।

यसअघि पटक–पटक ओली र प्रचण्ड–माधव नेपाल पक्षबीच छलफल भएपनि सहमतिको विन्दु नभेटिएपछि कार्यदल बनाइएको हो । कार्यदलमाथि नै वरिष्ठ नेताद्धय नपाल, खनाल र प्रवक्ता श्रेष्ठले प्रश्न उठाएपछि कार्यदललाई प्रष्ट कार्यादेश दिन सचिवालय बैठक बोलाइएको हो ।