काठमाडौँ । अमेरिकी विदेशमन्त्री एन्टोनी ब्लिन्कन र प्रधानमन्त्री शेरबहादुर देउवाबीच टेलिफोन कुराकानी भएको छ । एमसीसीसँग सरकारले गरेको सम्झौता संसदबाट अनुमोदन भएको दुई दिनपछि ब्लिन्कन र देउवाबीच गएराति टेलीफोन संवाद भएको हो ।

नेपालको संसदबाट एमसीसी सम्झौता अनुमोदन भएकोबारे आफूहरूबीच कुराकानी भएको अमेरिकी विदेशमन्त्री ब्लिन्कनले ट्विटरमार्फत संकेत गरेका छन् । उनीहरूबीच रुसले युक्रेनमा गरेको सैन्य आक्रमण र दुई देशले युक्रेनको सार्वभौमसत्ता र भौगोलिक अखण्डतामा गरेको समर्थनबारेसमेत छलफल भएको ब्लिनकलने जनाएका छन् ।

आफूहरुले आर्थिक विकास र क्षेत्रीय चुनौतीबारे नेपालसँग नजिक रहेर निरन्तर काम गर्न चाहेको उनले बताएका छन् । प्रधानमन्त्री देउवाको सचिवालयले भने उक्त कुराकानीबारे जानकारी सार्वजनिक गरिसकेको छैन ।