काठमाडौँ ।  बागमती प्रदेश सरकारले बाढी-पहिरोबाट क्षति पुगेका स्थानीय तहलाई आर्थिक सहयोग गर्ने निर्णय गरेको छ।

मुख्य मन्त्री एवं बागमती प्रदेश विपद् व्यवस्थापन निर्देशक समितिका अध्यक्ष डोरमणि पौडेलको अध्यक्षतामा आज बसेको समितिको बैठकले ७ गाउँपालिका र दुई नगरपालिकालाई क्षतिका आधारमा सहयोग उपलब्ध गराउने निर्णय गरेको हो।

धादिङको बेनीघाट रोराङ गाउँपालिकालाई रु.३० लाख, धादिङकै सिद्दलेक र गजुरी गाउँपालिकालाई २०/२० लाख, नुवाकोटको बेलकोटगढी नगरपालिकालाई २० लाख, सिन्धुपाल्चोकको बाह्रबिसे नगरपालिका र पाँचपोखरी थाङपाल गाउँपालिकालाई १५/१५ लाख, दोलखाको गौरीशंकर गाउँपालिकालाई ३० लाख, कालिञ्चोक र बिगु गाउँपालिकालाई १५/१५ लाख आर्थिक सहयोग गर्ने निर्णय गरिएको आन्तरिक मामिला तथा कानून मन्त्री शालिकराम जम्कट्टेलले जानकारी दिए।

ती स्थानीय तहका विभिन्न ठाउँमा बाढी-पहिरोले जनधनको क्षति पुर्‍याएकाले सहयोग गरेको जनाइएको छ।