काठमाडौँ । सत्तारुढ दल नेकपा माओवादी केन्द्रले यथास्थितिमा अमेरिकी सहयोग परियोजना एमसीसी पारित गर्न नसकिने निष्कर्ष निकालेको छ । आज बिहान बसेको माओवादी केन्द्रको संसदीय दलको बैठकले यस्तो निर्णय गरेको प्रमुख सचेतक देव गुरुङले जानकारी दिनुभयो ।

नेता गुरुङले यथास्थितिमा एमसीसी संसदमा टेबल गरे विपक्षमा मत दिने निर्णय गरिएको बताउनुभयो । गठबन्धनमा सहमति नभइ एमसीसी टेबल गरे आफूहरु सरकारमा बसिरहन नमिल्ने पनि उहाँले बताउनुभयो ।

माओवादीले संसदमा एमालेको अवरोध कायमै रहेको भन्दै माओवादीले यो अवस्थामा कुनै पनि एजेण्डा अघि बढ्न नसक्ने बताएको छ । आज दिउँसो १ बजेका लागि बोलाइएको प्रतिनिधि सभा बैठकमा सरकारले सर्वाधिक चर्चा र विवादित बनेको एमसीसी टेबल गर्ने तयारी गरेको छ ।