काँग्रेसमा योग्यता र योगदानका आधारमा न्याय होस, भागबण्डा नहोस ः डा चन्द्र भण्डारी

काठमाडौं । नेपाली काँग्रेसको सम्पादन समिति बनाउने र निर्वाचनको मिति तोक्ने विषयमा पार्टी सभापति तथा प्रधानमन्त्री शेरबहादुर देउवाले पार्टी भित्र छलफल गरेको भन्दै नेताहरुले असन्तुष्टि जनाएका छन् ।

हालै सम्पन्न १४ औँ महाधिवेशनमा ४० प्रतिशत मत ल्याएको पक्षसँग परामर्श र समन्वय नगरी कार्यसम्पादन समिति बनाउन लागेको प्रति शेखर कोइराला पक्षका नेताहरुले असन्तुष्टि जनाएका छन् ।

कोइराला पक्षबाट उपसभापतिमा उम्मेदवार बन्नुभएका काँग्रेस नेता डा चन्द्र भण्डारीले महाधिवेशनमा चालिस प्रतिशत मत ल्याएको पक्षलाई पनि समेट्न र समन्वय गर्न सभापति देउवासँग आग्रह गर्नुभयो ।

भागबण्डाको लागि नभइ न्याय र समान अवसरका लागि पार्टी भित्रको अर्को पक्षलाई सभापति देउवाले समेट्नु र सवन्वय गर्नु पर्ने नेता भण्डारीको भनाई छ । आज बस्न लागेको केन्द्रीय कार्यसमितिको बैठकले कार्यसम्पादन समिति बनाउने चर्चा चलेपनि सभापति देउवाले पार्टी भित्रको अर्को पक्षसँग छलफल र परामर्श नगर्दा एउटा गुटको मात्रै कार्यसम्पादन समिति बन्ने आशंका व्यक्त गर्नुभयो ।

“हामीले पार्टीका साथीहरुलाई समान अवसर र न्यायका लागि सभापतिको ध्यानाकर्षण गराएका हौँ, हामीले भागबण्डा गर्न खोजेको होइन, हामी भागबण्डा विरोधी हाँै,” उहाँले भन्नुभयो ।

विगतमा भागबण्डा गर्दा पार्टीलाई कति क्षती हुन्छ भन्ने कुरा आफुहरुले बुझेको स्पष्ट पार्दै नेता भण्डारीले पार्टीका सवैलाई क्षमता, योग्यता र योगदानका आधारमा सभापतिले न्याय गर्नुपर्ने र भागबण्डा गर्ने प्रबृत्ति अन्त्य गर्नुपर्नेमा जोड दिनुभयो ।