काठमाडौं । नेपाली काँग्रेसका नेता तथा पूर्व कानुन मन्त्री रमेश लेखकले स्थानीय तहको निर्वाचन सार्ने चाहना प्रधानमन्त्री शेरबहादुर देउवाको नभएको दावी गर्नुभएको छ ।

वैशाखमा गर्नुपर्ने निर्वाचन सार्ने गठवन्धनका अन्य दलहरुको प्रयासका कारण प्रधानमन्त्री देउवा अफ्टारोमा परेको उहाँको भनाई छ ।

“निर्वाचन सार्ने काँग्रेसको चाहना हैन, तर गठवन्धनमा भएकाले केही वाध्यता परेको हुनसक्छ, यस बारेमा चाडै निर्णय हुन्छ,” नेता लेखकले नेपाली रेडियो नेटवर्कसँग भन्नुभयो

उहाँले संविधान र ऐनमा खास समस्या नभएको दावी गर्दै बुझाइमा मात्रै फरक परेकाले अन्यौला देखिएको बताउनुभयो ।

निर्वाचनमा काँग्रेस हार्ने अवस्थामा पनि काँग्रेसले धेरै पटक निर्वाचन गराएको उल्लेख गर्दै उहाँले अहिले त काँग्रेसले जित्ने माहौँल भएकाले निर्वाचन सार्ने पक्षमा काँग्रेस नभएको उहाँले दावी गर्नुभयो ।

तर गठवन्धमा भएकाले चाहना फरक फरक भएकाले छलफल धेरै हुनुलाई अस्वभाविक रुपमा लिन नमिल्ने नेता लेखकको भनाई छ ।