काठमाडौँ । नेकपा (एकीकृत समाजवादी) का अध्यक्ष माधवकुमार नेपालले राष्ट्रियसभाको आज भएको चुनावमा गठबन्धनले सबै सिट जित्ने दाबी गर्नुभएको छ ।

आज पार्टी केन्द्रीय कार्यालय शान्तिनगरमा पार्टी प्रवेश गरेकाहरूलाई स्वागत गर्दै नेपालले यस्तो दाबी गर्नुभएको हो । राष्ट्रियसभाको चुनावको परिणामले अन्य चुनावमा पनि तरंग पैदा गर्ने उहाँले बताउनुभयो । उहाँले भन्नुभयो, ‘सबै ठाउँमा हामी जित्छौं । त्यसले पनि एउटा तरंग पैदा गर्नेछ ।’

संविधानलाई सर्वोपरी राखेर कानूनअनुसार नै चुनाव हुनुपर्छ भन्ने आफूहरूको भनाइ रहेको बताउँदै उहाँले सबै चुनाव एकैपटक गर्नसक्दा राम्रो हुनेमा जोड दिनुभयो ।

‘एउटा चुनाव गराउन ५ अर्ब खर्च हुन्छ,’ नेपालको भनाइ छ, ‘तीनवटा चुनाव गराउन २० अर्ब खर्च हुन्छ । एकैपटक गर्दा यो खर्च जोगिन्छ । उम्मेदवारको पनि पैसा जोगिन्छ ।’ त्यसका निम्ति हामीले छलफल गरिरहेका छौं,’ उहाँले भन्नुभयो । उहाँले निर्वाचन कहिले गर्ने भन्ने विषयमा व्यापक छलफल भइरहेको बताउनुभयो ।