२०८३, श्रावण ११ गते
- यो साता चर्चामा :
काठमाडौँ – नेकपा एमाले र माओवादी केन्द्रका अध्यक्षद्वयले अहिलेको सत्तारुढ गठबन्धनलाई आगामी चुनावसम्मै कायम राखिने दाबी गरेका छन् ।
माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादी पार्टीका अध्यक्ष माधवकुमार नेपालले आज दुई छुट्टाछुट्टै कार्यक्रममा चुनावसम्मै गठबन्धन गरेर जाने बताएका हुन् ।
कैलालीको धनगढीमा आयोजित पत्रकार सम्मेलनमा एकीकृत समाजवादीका अध्यक्ष नेपालले सत्तारुढ गठबन्धनलाई आगामी चुनावसम्मै कायम गरिने बताउनुभयो ।
विचार मिल्ने अरु पार्टीहरुसँग पनि चुनावी तालमेल गरिने तर अहिले कसैसँग पार्टी एकता भने नगर्ने उहाँले बताउनुभयो ।
आजै चितवनमा आयोजित कार्यक्रममा माओवादी केन्द्रका अध्यक्ष दाहालले गठबन्धनमा अन्य दललाई पनि ल्याउने पहल भइरहेको बताउनुभयो ।
माडीमा आयोजित कार्यकर्ता प्रशिक्षणमा उहाँले इमानदार कम्युनिष्टबीच एकताको झण्डा फहराउने दाबी गर्नुभयो ।
उहाँले आगामी निर्वाचनमा निरंकुश प्रवृत्ति हाबी हुने ठाउँमा परास्त गर्ने गरी अगाडि बढ्ने बताउनुभयो ।
एमाले हाबी भएको क्षेत्रमा कांग्रेससँग सिट तालमेल गर्ने केन्द्रीय तहमा समझदारी बनिसकेको पनि प्रचण्डले खुलासा गर्नुभयो ।
तर नेपाली कांग्रेसका जिल्ला तहका नेताहरुले भने अब रुखमा बाहेक अरु चिन्हमा कुनै हालतमा भोट नहाल्ने भन्दै कांग्रेससँग चुनावी तालमेलको सपना नदेख्न प्रचण्डलाई सुझाव दिएका छन् ।
केन्द्रमा गठबन्धनको सहमति भए प्रतिवाद गर्ने घोषणा कांग्रेसका जिल्ला तहका नेताहरुले गरिरहेका छन् ।
विगतमा गठबन्धनका नाममा ठूलो धोका भएकोले अब रुखमा बाहेक अरुमा भोट नहाल्ने उनीहरुको अडान छ ।
नेपाली कांग्रेस चितवनका सभापति जितनारायण श्रेष्ठले कांग्रेसीको भोट पाएर सांसद बन्ने र छोरीलाई मेयर बनाउने सपना नदेख्न प्रचण्डलाई सुझाव दिनुभयो ।
आगामी चुनावमा गठबन्धन गरेरै जाने माओवादी र एकीकृत समाजवादीका नेताहरुले पटक–पटक भन्दै आएका छन् ।
आज त प्रचण्ड र माधव नेपालले एमाले हाबी भएका ठाउँमा तालमेल गर्ने सहमति भैसकेको खुलासा पनि गरेका छन् ।
तर रुखमा बाहेक अन्यत्र भोट नहाल्ने जिल्ला तहका नेताहरुको घोषणाले कांग्रेस नेतृत्व अलमलमा परेको छ ।
