काठमाडौं- पूर्वप्रधानमन्त्री तथा नेकपा (एमाले)का अध्यक्ष केपी शर्मा ओलीले वर्तमान सरकारले राष्ट्रियताका मुद्दाहरुमा खुट्टा कमाएको टिप्पणी गर्नुभएको छ । प्रतिनिधिसभालाई सम्बोधन गर्दै उहाँले सरकारको साझा कार्यक्रममा कालापानी–लिपुलेकलाई फिर्ता ल्याउने कुरा नगरिएको भन्दै आपत्तिसमेत जनाउनुभयो ।

‘साझा कार्यक्रममा कालापानी भारतसँग वार्ता गरेर फिर्ता ल्याउँछौं किन सक्नुभएन ? यसलाई कालापानी समस्या भनेर राख्नुभयो । के यो समस्या हो ? हाम्रो अभिन्न भू–भाग, पवित्र भू–भाग समस्या हुन्छ ? समस्या समाधान कसरी गर्ने त ?, उहाँको प्रश्न छ, ‘छोडिदियो भने त समाधान होला नि ! स्पष्टरूपमा फिर्ता लिन्छौं भन्ने कि समस्या हो समाधान गर्छों भन्ने ? त्यस्तो खुट्टा कमाउनुपर्ने कसले बनायो ?’

छिमेकीहरूसँग सीमा समस्या समाधान गर्ने भनेर साझा कार्यक्रममा उल्लेख नगरिएको विषयमा पनि ओलीले प्रश्न उठाउनुभएको छ ।

‘त्यो हाम्रो पवित्र भू–भाग हो, फिर्ता लिनुस् । छोड्ने अधिकार कसैलाई छैन । सक्नुभएन भने ढेढ वर्ष पर्खिनुस् । हामी आउछौं’, उहाँले थप्नुभयो, ‘कुन–कुन देशसँग कहाँ–कहाँ के समस्या छ ? कति साह्रो डराएको ? जिब्रोबाट पनि रगत आइसक्यो होला चपाउँदा चपाउँदा !’

अर्को प्रशंगमा प्रतिनिधिसभामा प्रमुख प्रतिपक्षी दलका नेतासमेत रहनुभएका ओलीले अस्वाभाविक ढंगले सरकार गठन भएपछि सत्तापक्षका सांसदहरू दशैँमा केटाकेटी रमाएजस्तो रमाइरहेको टिप्पणी गर्नुभयो ।

बैठकलाई सम्बोधन गर्दै ओलीले सरकार गठन भएको एक महिनासम्म पनि बधाइ दिने र खुशीयाली मनाउने काम चलिरहेको टिप्पणी गर्नुभएको हो ।

‘सत्तापक्षका सांसदहरू सदनमा दशैँमा केटाकेटी रमाएजस्तै रमाइरहेको देखिन्छ, सरकार गठन भएको एक महिनासम्म धन्यवाद र बधाई के को लागि ?,’ पूर्वप्रधानमन्त्री ओलीले प्रश्न गर्नुभयो ।

संसद् पुर्नस्थापनापछि ओलीले पहिलोपटक संसद् बैठकलाई सम्बोधन गर्नुभएको हो ।

सर्वोच्च अदालतको परमादेशबाट शेरबहादुर देउवा प्रधानमन्त्री नियुक्त भएपछि विश्वासको मतको बेलामात्र संसद् बैठक कक्षभित्र छिरेका ओलीले यसबीचमा बैठकमा सहभागिता जनाउनुभएको थिएन ।