काठमाडौँ – झापाको काँकरभिट्टा नाकामा खटिएका १८ जना सशस्त्र प्रहरीमा कोरोना संक्रमण पुष्टि भएको छ । १७ जना पुरुष र एक जना महिला सशस्त्र प्रहरीमा कोरोना भाइरसको संक्रमण पुष्टि भएको हो ।

कोशी अस्पतालमा गरिएको पीसीआर परीक्षणमा उनीहरुमा कोरोना पोजेटिभ पाइएको हो ।

नेपालमा पछिल्लो चौबिस घण्टामा ३ हजार ९ सय ८७ जनाको पीसीआर परीक्षण गरिएकोमा १३३ जनामा संक्रमण पुष्टि भएको स्वास्थ्य मन्त्रालयका प्रवक्ता डा. जागेश्वर गौतमले शुक्रबारको नियमित प्रेस ब्रिफ्रिङका क्रममा जानकारी दिएका छन् । ।

उनका अनुसार यो सँगै नेपालमा हाल सक्रिय कोरोना संक्रमितको संख्या ५ हजार ३ सय ८३ रहेको छ । पछिल्लो चौबिस घण्टामा १०७ जना आइसोलेसन सेन्टरबाट डिस्चार्ज भएका छन् ।

प्रवक्ता डा. गौतमका अनुसार हालसम्म डिस्चार्ज हुनेको संख्या १२ हजार ९ सय ४७ पुगेको छ । नेपालमा कोरोना संक्रमणका कारण मृत्यु हुनेको संख्या ४४ पुगेको छ ।

शुक्रबार पर्साकी ८५ वर्षीया महिलाको निधन भएको हो । मुटु सम्बन्धी रोग र निमोनिबाट समेत ग्रसित रहेकी उनको कोरोना संक्रमणका कारण शुक्रबार बिहान नारायणी अस्पतालमा निधन भएको प्रवक्ता डा. गौतमले जानकारी दिए ।

योसँगै नेपालमा कोरोना संत्रमणका कारण निधन हुनेको संख्या ४४ पुगेको उनले बताए । हालसम्म कोरोना संक्रमित भएकाहरुको संख्या १९ हजार ४ सय ४४ रहेको छ ।