काठमाडौँ — नेपाल एयरलाइन्सको वाइडबडी जहाज ५६० वटा अक्सिजन सिलिन्डर लिएर ओमानबाट आज साँझ त्रिभुवन अन्तर्राष्ट्रिय विमानस्थलमा आइपुगेको छ । गैरआवासीय नेपाली संघ (एनआरएनए) र मस्कटस्थित नेपाली दूतावासको सहकार्यमा सिलिन्डर जुटाइएको हो ।

एनआरएनए मध्यपूर्वका सचिव आरके शर्माका अनुसार अल हप्सी ट्ेरडिङ कम्पनीसँग ६३ हजार ७ सय डलर भुक्तानी गरेर सिलिन्डर खरिद गरिएको हो । यो रकम खाडी क्षेत्रमा कार्यरत नेपाली श्रमिक र व्यवसायी र सामाजिक संघ-संस्थाबाट एनआरएनको नेतृत्वमा उठाइएको हो ।

आर्थिक संकलनका जिम्मेवारी लिएका सचिव शर्माले ओमान, कतार, कुवेत, बहराइन, साउदी अरब र संयक्त अरब इमिरेट्स (युएई)मा रहेका नेपालीबाट सिलिन्डर खरिदमा उत्साहजनक सहभागिता रहेको बताउनुभएको छ । हालै एक भिडियोमार्फत उहाँले मातृभूमिलाई परेको संकटबाट जुध्न सबै प्रवासी नेपाली हातेमालो गर्नुपर्ने बताउनुभएको छ ।

‘मातृभूमिमा आपत परेको अवस्थामा आफ्ना परिवार, आफन्त र साथीभाइलाई बचाउन खाडीमा कार्यरत नेपालीले आफ्नो जिम्मेवारी पूरा गरेको छ’, उहाँले भन्नुभएको छ, ‘हरेक हिसाबको पारदर्शी रहन्छ । रकम बढी भएमा थप यस्तै कार्यमा लगाइनेछ ।’

ओमानका लागि नेपाली राजदूत शर्मिला पराजुलीले सामुदायसँगको हातेमालोले सिलिन्डर जुटाउन सफलता मिलेको बताउनुभएको छ ।