काठमाडौं । निजी तथा आवासीय विद्यालय अर्गनाइजेशन नेपाल (प्याब्सन)का अध्यक्ष टीकाराम पुरीले कोरोनाको संक्रमण जोखिम उच्च रहेका स्थानका विद्यालय बन्द गर्नुपर्ने बताउनुभएको छ ।

उहाँले देशैभरका विद्यालय एकै चोटी बन्द गर्नुभन्दा जुन स्थानमा संक्रमण जोखिम उच्च भयो ती विद्यालय बन्द गर्नुपर्ने उल्लेख गर्नुभयो ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै अध्यक्ष पुरीले अन्य सबै भिडभाड हुने गतिविधि गरेर विद्यालयलाई मात्रै सङ्क्रमण फैलाउने क्षेत्र भनेर व्याख्या गरिन नहुने पनि प्रष्ट पार्नुभएको छ ।

उहाँले स्वास्थ्य मापदण्ड पालनाबारे शैक्षिक संस्थामा विद्यालयमा अनुगमन निरीक्षण अहिलेको आवश्यक्ता रहेको दावी गर्नुभएको छ ।

अध्यक्ष पुरीले शैक्षिक संस्था लामो समय बन्द गर्दा विद्यार्थीको पढाइमा असर पर्ने भन्दै अरु विकल्पका विषयमा पनि सरकारले सोच्नुपर्ने धारणा राख्नुभयो ।