काठमाडौं । विवादमा अल्झीएको नेकपा स्थायी कमिटिको बैठकमा आजदेखि दुवै अध्यक्षको प्रतिवेदनमाथी छलफल गर्ने तयारी भएको छ । गत २१ गते सुरु भएर आजसम्मका लागि स्थगित गरिएको बैठकमा स्थायी कमिटि सदस्यहरुले बोल्ने क्रम सुरु हुने बरिष्ठ नेता झलनाथ खनालले जानकारी दिनुभयो ।

उहाँले पार्टीलाई अव कसरी अगाडि बढाउने भन्ने बारेमा बैठकबाट नै टुङ्गो लगाइने नेपाली नेटवर्कसँग बताउनुभयो । बैठकको सुरुको दिनमा पार्टी अध्यक्ष तथा प्रधानमन्त्री केपी शर्मा ओली अनुपस्थीत भएपनि आज भने उपस्थीत हुने संभावना रहेको जनाइएको छ ।

ओली निकट मानिनु हुने पूर्व सभामुख सुवासचन्द्र नेम्वाङ्ले आजको बैठकका प्रधानमन्त्री ओली सहभागी हुने दावी गर्नुभयो । बैठक दिउँसो १ बजेका लागि पार्टीको केन्द्रीय कार्यालय धुम्बाराहीमा तय गरिएको छ । बैठक सुरु हुने दिन प्रधानमन्त्री ओलीले स्थायी कमिटिलाई पत्र लेखेर दुवै अध्यक्षको प्रतिवेदन स्थगित गरेर मात्रै आफु बैठकमा सहभागी हुने बताउनु भएको थियो ।

नेकपामा ओली निकट नेताहरुले दुवै अध्यक्षको प्रतिवेदन स्थगित गरेर मात्रै बैठकलाई अगाडि बढाउनु पर्नेमा जोड दिने गरेका छन् भने अर्का अध्यक्ष पुष्पकमल दाहाल प्रचण्ड र बरिष्ठ नेता माधवकुमार नेपाल पक्षले दुवै प्रतिवेदनमाथी छलफल गरेर निचोडमा पुग्ने पर्ने अडान राख्ने गरेको छ ।