काठमाडौं । फिफा महिला वरीयतामा नेपालले ऐतिहासिक सफलता हासिल गरेको छ। विश्व फुटबलको सर्वोच्च निकाय फिफाले सार्वजनिक गरेको नयाँ वरीयतामा नेपाल १३ स्थान माथि उक्लँदै ८७औँ स्थानमा पुगेको छ। यो नेपाली टोलीले हासिल गरेको हालसम्मकै उच्च वरियता हो।

यसअघि नेपाल ९१औँ स्थानसम्म पुगेको थियो। यसअघि १००औँ वरियतामा रहेको नेपाल यसअघिको अङ्कबाट ४६.४९ अङ्क बढेर नयाँ वरियतामा ८७औँ स्थानमा पुगेको हो। एसियाली राष्ट्रहरूमध्ये नेपाल १६औँ स्थानमा छ।

नेपालले महिला एसियन कप छनोटमा श्रीलङ्का र लाओसलाई हराउँदा उज्बेकिस्तानसँग बराबरी खेलेको थियो। यस प्रतियोगितापछि नेपालको वरियतामा ठुलो सुधार आएको हो। फिफा वरियताको शीर्ष स्थानमा स्पेन उक्लिएको छ भने अमेरिकी टोली दोस्रोमा झरेको छ।