काठमाडौं । काठमाडौं महानगरपालिकाले कर्मचारीको तलब खातामा पठाएको छ । महानगरका मेयर बालेन्द्र शाह (बालेन) देखि महानगरका सबै जनप्रतिनिधि र कर्मचारीको तलब आज खातामा पठाइएको हो ।

महानगरका कर्मचारीले पाउन बाँकी रहेको ३ महिनादेखि ६ महिनासम्मको तलब पाएको महानगरका प्रवक्ता नवीन मानन्धरले जानकारी दिनुभयो । महानगरले २९ सय व्यक्तिलाई १ अर्ब १३ करोड रुपैयाँ बराबरको तलब निकासा गरेको मानन्धरले जानकारी दिनुभयो ।

काठमाडौं टावरको नक्सा १२ तलाको ठाउँमा १९ तलाको पास गरेको भन्दै मेयर बालेनले प्रमुख प्रशासकीय अधिकृत सरोज गुरागाईंलाई ३ महिना अघि कारबाही गरेपछि महानगरको सबै आर्थिक कारोवारो रोकिएको थियो । मेयर बालेनले पटक पटक संघीय सरकारलाई अर्को प्रमुख प्रशासकीय अधिकृत पठाइदिन आग्रह गर्दा समेत पठाएको थिएन् ।

लामो समयदेखी कार्यालय प्रमुखबिहीन अवस्थामा रहेको महानगरमा चैत्र २१ गते प्रमुख प्रशासकीय अधिकृत गुरागाईंलाई कर्मचारी र अन्य जनप्रतिनिधीले जबरजस्ती कार्यालय प्रवेश गराएका थिए । कार्यालय प्रवेश गरेर गुरागाईँले हाजिर गरेसँगै रोकिएको कर्मचारीहरुको पारिश्रमिक समेत निकासा भएको हो ।