काठमाडौं। राष्ट्रिय लोक तथा दोहोरी गीत प्रतिष्ठान नेपालले चितवनको भरतपुरमा आयोजना गरेको ‘आठौं संस्करणको राष्ट्रिय रनिङ शिल्ड दोहोरीगीत प्रतियोगिता–२०८१’ को उपाधि बागलुङले हात पारेको छ ।

गत फागुन १७ गतेबाट सञ्चालित दोहोरी गीत प्रतियोगितामा कुल ४२ वटा टोली सहभागी रहेको मा अन्तिम तथा फाइनल प्रतिस्पर्धामा दोहोरी गीत प्रतिष्ठान म्याग्दीलाई पारजित गर्दै बाग्लुङको सुमन खड्का र तारा थापाको जोडीले उपाधी हात पारेको हो ।

उनीहरूले लोक दोहोरीतर्फको राष्ट्रिय रनिङ शिल्डसँगै तीन लाख रुपैयाँ, पदक र प्रमाणपत्र प्राप्त गरेका छन् । बागलुङसँग पराजित म्याग्दी टीमका निशान्त बिक र सपना रोकाको जोडी द्वितीय बन्दै नगद दुई लाख, ट्रफी, पदक प्राप्त गरेको छ ।

यस्तै प्रतियोगीतामा दोहोरी गीत प्रतिष्ठान चितवन तेश्रो बन्न सफल हुँदा र दोहोरी गीत प्रतिष्ठान नवलपुरले सान्त्वनामा चित्त बुझाएको छ । तेश्रो बनेको चितवनले एक लाख रुपैयाँ पुरस्कार प्राप्त गर्दा नवलपुरले ५० हजार रुपैयाँ प्राप्त गरेको छ ।

प्रतियोगीतामा प्रतिष्पर्धामा सहभागी कलाकारमध्येबाट गायक राजु लामिछाने र गायिका शर्मिला गुरुङ उत्कृष्ट गायक गायीका बन्दै नगद रु. २५/२५ हजार पुरस्कार प्राप्त गरेका छन् ।

यस्तै तेह्रथुमका कमल बुढा र कतार शाखाकी भावना अर्याल उत्कृष्ट नव गायक गायिका बनेका छन् भने दिलिप थापा मगर र सुष्मा ठकुरी अनुशासित गायक र गायिका बन्दा पाल्पाका दीपेन्द्र पौडेल र कालिकोटकी शितल कल्पनाले उत्कृष्ट भेषभूषाको पुरस्कार हात पारेका छन् ।

उनिहरुले पुरस्कारस्वरुप जनही १५ हजार रुपैयाँ र प्रमाणपत्र प्राप्त गरेका प्रतिष्ठानका केन्द्रिय सञ्चार विभाग प्रमुख तथा प्रशासनिक सहसचिव एवं लोक तथा दोहोरी गायक राजकुमार रायमाझीले जानकारी दिनुभयो ।

रायमाझीका अनुसार प्रतिष्ठानका अध्यक्ष रीता थापा मगरको अध्यक्षतामा फागुन १७ गतेदेखी फागुन २० गतेसम्म सञ्चालन भएको प्रतियोगीतको उद्याटन बागमती प्रदेशका मुख्यमन्त्री बहादुर सिंह लामाले गर्नुभएको थियो ।

यस्तै कार्यक्रमको समापन तथा पुरस्कार वितरण समारोह भरतपुर महानगरपालिकाकी मेयर रेणु दाहालको प्रमुख आतिथ्यतामा सम्पन्न भएको थियो । उक्त समारोहमा प्रतियोगीताका विभिन्न विधामा विजयी तथा उत्कृष्ट बनेका कलाकारहरुलाई पुरस्कार प्रदानसँगै सम्मान गरिएको थियो ।