काठमाडौं । सुदूरपश्चिम प्रदेशका आन्तरिक मामिला तथा कानुनमन्त्री प्रकाशबहादुर शाहलाई काठमाडौं ल्याइएको छ । कोरोना भाइरस संक्रमित मन्त्री शाहको स्वास्थ्यमा समस्या आएपछि काठमाडौं ल्याइएको हो ।

१५ कात्तिकमा कोरोना पुष्टि भएका मन्त्री शाह होम आइसोलेसनमा बसिरहनुभएको थियो । बिहीबार नाकबाट रगत बग्न थालेपछि उहाँलाई धनगढीस्थित सेती प्रादेशिक अस्पतालको कोरोना अस्पतालमा भर्ना गरिएको थियो ।

अस्थायी अस्पतालमा उपचारपछि साँझ डिस्चार्ज हुनुभएका शाह धनगढीस्थित सरकारी निवासमै आइसोलेसनमा बस्नुभएको थियो । तर, स्वास्थ्य अवस्था सुधार नभएपछि उहाँलाई काठमाडौं लगिएको उनका स्वकीय सचिव जंगबहादुर बिकले जानकारी दिनुभयो ।