काठमाडौं । नेपालका दुई ठूला दलहरू नेपाली कांग्रेस र नेकपा एमालेको सहकार्यमा नयाँ सरकार गठन हुँदैछ । सहकार्य अनुसार एमाले अध्यक्ष केपी शर्मा ओली चौथो पटक प्रधानमन्त्री नियुक्त हुनुभएको छ भने नेपाली कांग्रेसका सभापति शेरबहादुर देउवा डेढ वर्षपछि प्रधानमन्त्री बन्नुहुनेछ । ओलीको भोलि ११ बजे शपथ हुँदैछ । दुई ठूला दलको सत्ता समीकरण निर्माण भएसँगै माओवादी केन्द्र, रास्वपा र नेकपा एकीकृत समाजवादी प्रतिपक्षी बनेका छन् । राष्ट्रिय जनमोर्चा र नेमकिपा पनि प्रतिपक्षीमा बस्ने भएका छन् । यो सहकार्यले राजनीतिक स्थिरता, विकास र समृद्धिलाई मलजल गर्ने अपेक्षा लिइएको छ । निवर्तमान प्रधानमन्त्री पुष्पकमल दाहाल प्रचण्डको अस्थिरताका कारण यी दलहरू एक ठाउँमा उभिएको विश्लेषण हुन थालेको छ । यता, कांग्रेस सांसद रामहरि खतिवडाले प्रधानमन्त्री ओलीसँग काम गर्न सक्ने मन्त्री पठाउन थालिएको बताउनुभयो । साथै संविधानमा सुधारको आवश्यकता रहेकोले समीकरण बनेको उहाँको दाबी छ ।
राजनीतिक इमान्दारिता बचे डेढ वर्षपछि देउवा प्रधानमन्त्री बन्नुहुनेछ । यद्यपि, यसअघि ओलीका कैयन क्रियाकलाप विश्वास गर्न लायक नभएको विश्लेषकहरूले बताउने गरेका छन् । जनतामा छाएका निराशा, राजनीतिक वितृष्णका कारण नयाँ दल र स्वतन्त्रहरूको उदयले अत्तालिएका ठूला दलहरूले अब भने मुलुकको समुन्नतिका पक्षमा काम गर्ने झिनो आशा रहेको छ । अभिव्यक्तिहरूले आकाशको तारा झार्ने प्रवृत्ति हाबी हुँदा पनि जनतामाथि धोका भइरहेको छ । को मन्त्री बने, कुन मन्त्रालय पाए भन्दा पनि विगतका अनुभवले कति काम गर्न सके भन्ने महत्त्वपूर्ण विषय हो । तर, यो गठबन्धन पनि स्वार्थ प्रेरित भएकोले सुशासनको कल्पना गर्न नसकिने माओवादी नेता हिमाल शर्माको भनाइ छ ।
मुलुकका विभिन्न परिवर्तनहरूमा जीवन उत्सर्ग गरेका सहिदका सपना र विद्यमान दलका नेताहरूको चाहनालाई यो समीकरणले पूरा गर्न सक्ने धेरै सम्भावना देखिन्छ तर, राजनैतिक इमान्दारिता नै महत्त्वपूर्ण हो । जहिले पनि आफू र आफ्नालाई बनाउनका निम्ति समय र शक्ति खर्च हुँदा देश हारिरहेको छ । नेपाली जनताले धेरै चाहेका छैनन्, शिक्षा, स्वास्थ्य र रोजगारको उचित प्रबन्ध भए मात्रै राजनीतिकर्मीहरूलाई जहिले सम्मान गर्ने थिए की !
