काठमाडौं । कोरोना संक्रमणबाट थप ३ जनाको मृत्युु भएको छ । पूर्वी नवलपरासीमा कोरोना संक्रमणबाट होम आइसोलेसनमा रहेका दुई जनाको मृत्यु भएको छ ।

जिल्ला स्वास्थ्य कार्यालय प्रमुख केशव चापागाईंका अनुसार कावासोती नगरपालिका–६ का ६७ वर्षीय पुरुषको होम आइसोलेसनमा आज मृत्यु भएको हो ।

त्यसैगरी गैंडाकोट नगरपालिका–२ कि ७७ वर्षीया महिलाको होम आइसोलेसनमा मृत्यु भएको छ । उनीहरुको सुरक्षा निकाय, जनप्रतिनिधि र स्वास्थ्यकर्मीको निगरानीमा घर परिवारले नै दाह संस्कार गर्ने जनाइएको छ ।उनीहरु दुवै जनाको उपचार हुन नसकेर मृत्यु भएको हो ।

यसैबिच ,दाङ घोराहीका एकजना कोरोना संक्रमित पुरुषको आज विहान बाँकेमा मृत्यु भएको छ।

घोराही उपमहानगरपालिका वडा नं. ४ निवासी ७० वर्षीय पुरुषको उपचारका क्रममा बाँकेस्थित नेपालगञ्ज मेडिकल कलेज अस्पताल कोहलपुरमा विहान ५ बजे मृत्यु भएको हो ।

बाँकेका जिल्ला कोरोना फोकल पर्सन नरेश श्रेष्ठका अनुसार उनलाई कात्तिक ११ गते आइसियूमा भर्ना गरिएको थियो। हालसम्म बाँकेमा ४८ जना संक्रमितको मृत्यु भएको छ ।