काठमाडौं । नेकपा एमालेका उपाध्यक्ष युवराज ज्ञवालीले सहकारी ठगी प्रकरणमा दोषी कसैलाई पनि नछोड्ने बताउनुभएको छ ।

गृहमन्त्री तथा रास्वपाका सभापति रवि लामिछानेको नाममुछिएको उक्त प्रकरणमा छानबिन समिति बनाउनुपर्ने प्रमुख प्रतिपक्ष कांग्रेको माग कायमै रहेको बेला नेता ज्ञवालीले एक व्यक्ति विशेषभन्दा पनि समग्रमा छानबिनतर्फ जानुपर्ने र तथ्य र प्रमाणका आधारमा दोषी ठहरिएका जो सुकै व्यक्तिमाथि पनि कावबाही हुने स्पष्ट पार्नुभयो ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता ज्ञवालीले सरकार जहिले पनि पीडीतको पक्षमा रहेको बताउँदै कांग्रेसको मागका विषयमा पनि छलफलबाट समाधान निस्कने कुरामा विश्वास दिलाउनुभयो ।

कांग्रसले लगातार सहकारी प्रकरणमा नाम मुछिएका गृहमन्त्री लामिछानेको राजीनामा लगायतका माग राख्दै संसदमा अवरोध गरिरहेको छ भने आज बस्ने संसद बैठकमा पनि सोहि अडान कायम राख्ने बताएको छ ।

प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली र रास्वपाले भने यस विषयमा छानविन समिति बनाउनुपर्ने आवश्यक नै नरहेकाले कांग्रेसको मागलाई स्विकार्न नसकिने बताउँदै आइरहेका छन् ।