काठमाडौं । माओवादी केन्द्रका नेता माधव सापकोटाले स्वतन्त्र सांसद अमरेशकुमार सिंहको विषयलाई लिएर बहस गर्नु भनेको समयको बर्बादी मात्रै भएको बताउनुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता सापकोटाले सांसद सिंहले प्रधनमन्त्री पुष्पकमल दाहाल प्रचण्ड र उहाँकी छोरी गंगा दाहाललाई लगाएको आरोप सरासर गलत भएको दाबी गर्नुभयो ।

सांसद सिंहले प्रधानमन्त्रीसंग मन्त्रीको बार्गेनिङमा भएको र विविध कारणले आफूले मागेको पद नपाएपछि विभिन्न ढंगबाट प्रधानमन्त्री प्रचण्डको विरोध र आलोचना गरिरहेको आरोप लगाउनुभयो ।

नेपाली राजनीतिमा विकृतीको नमुनाका रुपमा सांसद सिंह प्रस्तुत भइरहेको समेत बताउनुभयो । यस्तै अहिलेको निर्लज्जतालाई छाडेर नैतिक धरातलमा उभिन आग्रह समेत गर्नुभयो ।

सांसद सिंहले पछिल्लो समय भएको एनसेल खरिदबिक्री प्रकरणमा सरकारमै सामेल व्यक्तिहरुको मिलेमतो रहेको बताउँदै सिंहले आवश्यक परे प्रमाण पेश गर्नेसम्मको चेतावनी दिनुभएको छ सांसुद सिहंले प्रधानमन्त्री प्रचण्डको अकुत सम्पत्तिबारे प्रश्न गर्नुभएको छ ।

हिजोको अवस्थामा निकै कमजोर धरातलबाट आएका प्रचण्ड परिवारको अहिलेको विलासिता ढाहा लाग्दो रहेको उहाँको भनाइ छ ।