काठमाडौं । स्वतन्त्र सांसद अमरेशकुमार सिंहले आफ्नो राजनीतिक इतिहासमा ठूलो चुनौति उठाउनुभएको छ । पछिल्लो समय भएको एनसेल खरिदबिक्री प्रकरणमा सरकारमै सामेल व्यक्तिहरुको मिलेमतो रहेको बताउँदै सिंहले आवश्यक परे प्रमाण पेश गर्नेसम्मको चेतावनी दिनुभएको छ । लामो समय देखि यो देशमा नेता र तिनका परिवारहरुले भ्रष्टाचार गर्दै आएको बताउँदै स्वतन्त्र सांसुद सिहंले प्रधानमन्त्री पुष्पकमल दाहाल प्रचण्डको अकुत सम्पत्तिबारे प्रश्न गर्नुभएको छ । हिजोको अवस्थामा निकै कमजोर धरातलबाट आएका प्रचण्ड परिवारको अहिलेको विलासिता ढाहा लाग्दो रहेको उहाँको भनाइ छ।

एनसेल नेपाल प्रवेश गरेदेखिनै सधैँ विवादमा रह्यो । यसबाट विभिन्न दल र तिनका नेताहरुले लाभ लिएको आरोप समेत लाग्ने गरेको छ । नियामक निकाय दूरसञ्चार प्राधिकरणलाई जानकारी नदिइ खरिदबिक्री हुँदा समेत सरकारले गतिलो निर्णय लिन सकेको छैन । आगामी चार वर्षमा सरकारकै स्वामित्वमा आउने यो कम्पनीले कर छली गर्न र लामो समय मूनाफा लिनका लागि चलाखी गरेको धेरैको बुझाइ रहेको छ । राजनीतिक विश्लेषक प्राडा गोविन्दमान सिंह कार्कीले स्वतन्त्र सांसद सिंहले लामो समयदेखि यो मुद्धा उठाउँदै आएको भन्दै कहीँ न कहीँ गलत भएकोले सरकार मौन भएको बताउनुभएको छ । यो देशमा ठूला–ठूला काण्डहरु पचेको स्मरण गर्दै उहाँले एनसेलमा त्यस्तो हुन नदिन सबैलाई आह्वान समेत गर्नुभयो ।

अमरेश आक्रामक भएर उत्रिएपछि माओवादी नेता, कार्यकर्ताहरुले अध्यक्ष प्रचण्डको बचाऊ गर्दै आएका छन् । यद्यपि गलत भएको भए जो कोही पनि कारबाहीको दायरामा आउनुपर्ने उनीहरुको धारणा छ । सांसद लेखनाथ दाहाल राजनले एनसेलबाट बदमासी भएको बताउँदै समितिले अनुसन्धान गरिरहेको प्रष्ट पार्नुभयो ।

मुलुकको धमिलो राजनीतिमाथि पटकपटक माछा मार्ने काम भइरहेको पाइन्छ । यो सत्तापक्षबाट होस् वा प्रतिपक्षबाट । जहिले पनि पीडामा पर्ने जनतामात्रै हुन् । अहिले त झन् नेताहरु विलासी जनताहरु गरिब बन्दै गएका छन् । भएभरको जनशक्ति विदेशिदै छ, वृद्धवृद्धा र बालबालिका मात्रै यहाँ भेटिन्छन् । यी र यस्तै काण्डहरुका कारण दिनप्रतिदिन निराशा छाउँदै गएको छ।