काठमाडौं। नेपालमा थप तीनजना संक्रमितको मृत्यु भएको छ । विराटनगरस्थित कोशी अस्पताल कोभिड १९ उपचार केन्द्रमा कोरोना संक्रमित बृद्धको उपचारका क्रममा मृत्यु भएको छ।

केन्द्रका संयोजक वरिष्ठ फिजिसियन डा. दिपक सिग्देलका अनुसार मोरङको बुढीगंगा गाँउपालिका ५ का ७१ वर्षीय बृद्धको आज मंगलबार उपचारका क्रममा मृत्यु भएको हो ।

यसैबिच, चितवनमा उपचाररत दुई संक्रमितको मृत्यु भएको हो । चितवन मेडिकल कलेजमा उपचाररत एक वृद्धको कोरोना सङ्क्रमणका कारण मृत्यु भएको छ ।

अस्पतालका निर्देशक डा. दयाराम लम्सालका अनुसार मृत्यु हुनेमा भरतपुर महानगरपालिका वडा नम्बर १० का ७८ वर्षीय वृद्ध रहेका छन् ।

उनमा असोज २३ गते कोरोना सङ्क्रमण पुष्टि भएको थियो । उनी निमोनियाका कारण २४ गते अस्पतालमा भर्ना भएका थिए । उनको उपचारका क्रममा गयराति मृत्यु भएको हो ।

यस्तै रूपन्देहीको तिलोत्तमा १५ की ३५ वर्षीया महिलाको पनि सोही अस्पतालमा उपचारका क्रममा मृत्यु भएको छ । मेडिकल कलेजका निर्देशक लम्सालका अनुसार श्वासप्रश्वासको समस्या रहेकी उनको उपचारका क्रममा हिजो मृत्यु भएको हो ।