काठमाडौं । पछिल्लो समय नेपालका पुराना राजनीतिक दलहरूले जनतासँग सम्पर्क बढाउने अभियानको थालनी गरेका छन् । एमालेको ग्रास रुट अभियानदेखि नेपाली कांग्रेसको संगठन सुदृढीकरण अभियान सम्पन्न भइसकेका छन् । नयाँ राजनीतिक दलहरूको उदयसँगै पुराना दलहरू आफू सच्चिएर अगाडि बढ्ने प्रतिबद्धतासहित जनताको घरदैलोमा पुगेका हुन् । नेपाली कांग्रेसका सूचना, सञ्चार तथा प्रचार विभाग प्रमुख मीन विश्वकर्माले यो अभियानले कांग्रेस जनताको हितमा छ भन्ने सन्देश प्रवाह भएको बताउनुभयो । कांग्रेसको इतिहासले पनि मुलुकको भविष्य कोरेकोले अबको बाटो पृथक रहने उहाँको भनाइ छ ।
अहिले नेकपा माओवादी केन्द्र पनि जनताको घरदैलोमा पुग्ने र आफ्ना एजेन्डा बताउने लक्ष्यका साथ अभियानमा जुटेको छ । अभियानका क्रममा विकास निर्माणको कामका साथै सरसफाइ र रक्तदानसहित सहिद परिवारलाई सम्मान गरिएको छ । माओवादी केन्द्र सुध्रिने वा विघटन हुने परिस्थिति आएपछि अभियान सञ्चालन गरिएको नेता सरल सहयात्रीको भनाइ छ । उहाँले पार्टीको संगठनात्मक संरचनामा आएको उतारचढावलाई समेत पार्टी कार्यकर्तालाई बुझाउन आवश्यक रहेको बताउनुभयो । गैर सम्पत्ति आर्जनको आरोप खेपिरहेका बेला पारदर्शिता समेत आवश्यक रहेकोमा सरलको जोड छ ।
माओवादीले पहिलो पटक फरक कार्यक्षेत्रमा आफ्ना नेता तथा कार्यकर्ता परिचालन गरेको छ । त्यसबाट स्थानीयस्तरमा भएको कमी–कमजोरी सुधार्ने तथा नयाँ ढङ्गले सङ्गठनको विस्तार हुने पार्टीको विश्वास छ । पार्टी सचिव चक्रपाणी खनाल बलदेवका अनुसार जनतासँगको सम्बन्धलाई रूपान्तरणसहित सुधार गर्ने अभियानको मुख्य लक्ष्य रहेको छ । विगतका एजेन्डाहरूलाई पुनर्ताजकी बनाउन पनि यसले मदत गर्नेछ ।
राजनीतिक विश्लेषक भेषराज घिमिरेले पार्टी संगठन पतन भइरहेको अवस्थामा सरकारले गरिरहेका केही कामहरूलाई लिएर जनतालाई भरोसा दिलाउने पक्षमा माओवादी केन्द्र लागेको छ । पछिल्लो समय उठेको भ्रष्टाचार काण्डका बारेमा पनि जनतालाई बुझाउन माओवादी अभियानमा जुटेको छ ।
राजनीतिक परिवर्तनबाट प्राप्त उपलब्धिबाट सामाजिक–आर्थिक रूपान्तरण गर्नु, नागरिकको जीवनमा देखिने गरी परिवर्तन गर्नु, सुखी जीवनयापनका लागि तीव्र गतिमा विकासका कार्य अगाडि बढाउनु तथा देशमै श्रम र रोजगारीको सुनिश्चित गर्नु अभियानको अर्को ध्येय रहेको छ । मुलुकका हरेक पार्टीहरूले जनताको पक्षमा काम गरिरहेका भ्रम त छर्ने गरेका छन् तर त्यसको ठोस उपलब्धि परिणाम देखिएको छैन । परिणामले त युवा पलायन देखाएको छ, बेरोजगारी बढाएको छ, कलकारखाना बेचाएको छ, अर्थतन्त्र खुम्चयाएको छ, राजनीति गर्नेहरूको आर्थिक हैसियत तन्काएको छ ।
