काठमाडौं । केही दिनयता धुम्मिएको काठमाडौं उपत्यकामा आज मध्याह्नदेखि खुला देखिएको छ । उपत्यकाको आकाश खुलेसँगै निरन्तर ओरालो लागेको तापक्रम केही बढ्ने मौसमविद्हरुले बताएका छन् ।

शुक्रबार रातिदेखि पश्चिमी वायु सक्रिय भएसँगै उपत्यकाको आकाशमा भएको धुलाका कणहरु पनि बहेको मौसविद् एवं त्रिभुवन विश्वविद्यालय जल तथा मौसम विज्ञान विभागका सहप्राध्यापक डा. चिरञ्जिवी पोखरेलले बताउनुभयो ।

उहाँका अनुसार अहिले प्रवेश गरेको पश्चिमी वायुमा पानीको बाफ (मोइस्चर) छैन । यो अवस्था अझै एक हप्तासम्म रहने उहाँले जानकारी दिनुभयो । यस्तै, पानी पर्ने सम्भावना पनि कम रहेको मौसिमविद् पोखरेलले जानकारी दिनुभयो ।

यो अवस्था अझै केही दिन रहे देशका विभिन्न स्थानमा डढेलोको पनि सम्भावना रहेको मौसमविद्हरुले बताएका छन् । सहप्राध्यापक पोखरेलका अनुसार १५ दिनसम्म अझै पानी नपर्ने हुदा हिउँदेबालीलाई प्रत्यक्ष असर पुग्ने छ ।