काठमाडौं । नेपाली कांग्रेसका केन्द्रीय सदस्य थापाले वर्तमान् सरकारले ०७९ मा हुने आम निर्वाचन निष्पक्ष गराउनेमा आफू विश्वस्त नभएको बताउनुभएको छ ।

सामाजिक लोकतन्त्र अध्ययन केन्द्रले गरेको वागमती प्रदेशको भर्चुअल बैठकमा बोल्दै सांसद थापाले कम्युनिष्ट सरकारले स्वच्छ र निष्पक्ष निर्वाचन गराउँछ भन्नेमा आफूलाई विश्वास नरहेको बताउनुभएको हो ।

उहाँले सरकारलाई स्वच्छ र निष्पक्ष निर्वाचन गराउन बाध्य पार्नेगरी कांग्रेसले काम गर्नुपर्ने पनि बताउनुभयो । त्यसका लागि कांग्रेसले प्रतिपक्षीको भूमिका राम्रोसँग निर्वाह गर्नुपर्ने उहाँको भनाइ छ ।

थापाले आफ्नो पार्टीको नेतृत्वले विभिन्न नियुक्ति र लेनदेनमा सरकारसँगै लसपस गरेको देखिएको आरोपसमेत लगाउनुभएको छ ।

उहाँले आगामि १४ औं महाधिवेशनमा पार्टीलाई एकढिक्का बनाउने एजेन्डा रहेको भन्दै यसको एउटै उपाय विधानको पालना गर्नु भएकोमा सभापति देउवा विधानअनुसार चल्ननसकेको बताउनुभयो ।

‘सभापतिको विभाग गठनमा देखिएको बलमिच्याइले विश्वास संकट पैदा भएको छ’, उहाँले भन्नुभयो ।

कोरोनाविरुद्ध लड्ने कुरामा सरकारको असफलतादेखि भ्रष्टचारका काण्डहरुले जनता सरकारसँग निराश भएको भए पनि काग्रेसको भूमिकाप्रति जनता अझै सन्तुष्ट हुन नसकेको उहाँको आरोप छ ।

उहाँले कांग्रेस पार्टी कुनै बेला सामाजिक अभियानका रुपमा रहेको तर अहिले पार्टीले त्यो स्वरुप गुमाएको पनि बताउनुभएको छ ।