काठमाडौं । नेपालमा यस वर्ष डेंगी संक्रमणबाट ४२ जनाको मृत्यु भएको छ । देशभरका ७६ जिल्लामा फैलिएको डेंगीबाट साउनयता मात्र ३२ हजार १२१ जना संक्रमित भएका छन् । सबैभन्दा बढी संक्रमित काठमाडौं उपत्यकामा छन् ।
डेंगी मानिसबाट मानिसमा सर्ने रोग भने होइन । यो एडिस एजिप्टी र एडिस एल्बोपिक्टस प्रजातिका लामखुट्टेहरूको टोकाइबाट सर्ने गर्छ । त्यसैले यसबाट जोगिन लामखुट्टेको टोकाइबाट बच्नुपर्ने स्वास्थ्य तथा जनसंख्या मन्त्रालयले जनाएको छ ।
नेपालमा डेंगीको संक्रमण २०६१ सालमा देखिएको थियो। त्यसयता हरेक वर्ष डेंगी देखिंदै आएको छ। यो वर्ष साउनदेखि डेंगीको संक्रमण सुरु भएको हो। दुई महिनामै प्रकोपका रूपमा फैलिएको छ।
