काठमाडौं। पूर्व मन्त्री एवम् नेपाली कांग्रेसका नेता मोहन बस्नेत एक हुल व्यापारीहरुलाई लगेर परराष्ट्रमन्त्री नारायण खड्कालाई भेट्न पुग्नुभयो ।

व्यापारीका गुनासा मात्रै होइन आक्रोश बोकेर उनीहरु मन्त्री भेट्न गएका थिए । चीनले एकमहिना यता रसुवागढी नाकाबाट हुने निर्यात रोकेपछि दशैँ र तिहारका लागि आयात गरिएका व्यापारीका अर्बौं मूल्यका सामान केरुङमै रोकिएका छन् ।

तिब्बत क्षेत्रमा कोरोना संक्रमण बढेको भन्दै चीनले रसुवागढी नाकाबाट हुने निर्यातमा रोक लगायो । नेपालीहरुको महान पर्व नजिकिएसँगै व्यापार हुने आशामा रहेका व्यापारी सामान बाटोमै अलपत्र पर्दा निराश छन् ।

बस्नेतको पहलमा परराष्ट्रमन्त्रीलाई भेट भएपनि उनीहरु सहजै सामान आउनेमा विश्वस्त बन्न सकेका छैनन् । यता, बस्नेतले पटकपटक नाकालाई सहज गराउनका निम्ति पहल गरेको स्मरण गर्नुभयो ।

व्यापारीक नाका खुलेको देखिएपनि विभिन्न समस्या आइरहेको बताउँदै बस्नेतले चिनियाँ सभामुख आएको अवसरमा यो विषय उठाउनुपर्ने बताउनुभयो । नाकामा सामान अलपत्र पर्दा ऋणको भारी थपिएसँगै दुईजना व्यापारीले आत्महत्या गरिसकेको बस्नेतको भनाइ छ ।

नेपाल सरकार, राजनीतिक दलहरु र चिनियाँ पक्षसँग संवादहीनताको परिस्थितिले व्यापारी पिल्सिएको नेपाल राष्ट्रिय व्यवसायी महासंघका संस्थापक अध्यक्ष नरेश कटवालले बताउनुभयो ।

घरेलु तथा साना उद्योग महासंघका सचिव रुद्र न्यौपानेका अनुसार चिनियाँ बर्डर बेलाबेला अवरोध भइरहनुको मुख्य कारण ठूला मुलुकहरुबीचको लडाइँ पनि एक हो ।

नाका बन्द हुँदा दशैँ, तिहार र जाडोका लागि आयात गरिएका लुगाकपडा, जुत्ता चप्पललगायतका सामान रोकिएका छन् । राजधानीलगायत मुलुकका मुख्य बजारमा चिनियाँ सामानकै वर्चस्व छ ।

केरुङमा रोकिएको सामान करिब २ अर्ब ५० करोड रुपैयाँ बराबरको रहेको बताइएको छ । कहिले भारत, कहिले चीनको दम्भमा फसेका नेपाली व्यापारीलाई सहज गर्न सरकारको प्रमुख दायित्व हो ।