काठमाडौं । पछिल्लो २४ घण्टा नबित्दै कोरोनाबाट नेपालमा थप सात जनाको मृत्यु भएको छ ।

वीरगन्जको गण्डक अस्थायी कोभिड अस्पतालमा आज बिहान रौतटहको राजपुर तुलसीका ४० वर्षीय पुरुषको मृत्यु भएको नारायणी अस्पतालका चिकित्सक डाक्टर अतुलेश चौरसियाले जानकारी दिनुभयो ।

यसअघि, शनिबार बेलुक पनि वीरगन्ज हेल्थ केयर अस्थायी कोभिड अस्पतालमा रौतहटकै गम्हरिया –३ का संक्रमित ३० वर्षीय पुरुषको मृत्यु भएको थियो ।

त्यस्तै, सुनसरीमा आमा–छोराको मृत्यु भएको छ । धरानस्थित बिपी कोइराला स्वास्थ्य विज्ञान प्रतिष्ठानमा भर्ना भएको केही घण्टामै कोरोना संक्रमित आमा–छोराको मृत्यु भएको हो ।

त्यसैगरी, सप्तरीमा थप एक जना महिलाको मृत्यु भएको छ । मृत्यु हुनेमा राजविराज नगरपालिका वडा नम्बर –२ निवासी ६५ वर्षीया महिला छिन् ।

यता, पाटन अस्पतालमा उपचार गराइरहेका एकजना पुरुषको गयराति मृत्यु भएको छ ।

संक्रमण देखिएपछि साउन २८ गतेदेखि पाटन अस्पताल भर्ना भएका २९ वर्षीय युवकको उपचारका क्रममा गयराति मृत्यु भएको जिल्ला स्वास्थ्य कार्यालय ललितपुरले जनाएको छ ।

त्यसैगरी, भक्तपुरमा पनि थप एक जनाको मृत्यु भएको छ । होम आइसोलेसनमा रहेका भक्तपुरका ६५ वर्षीय संक्रमित पुरुषको गएराति मृत्यु भएको हो ।

भक्तपुर नगरपालिका १, दूधपाटीको होम आइसोलेनमा रहेका ६५ वर्षीय पुरुषको गएराति मृत्यु भएको जिल्ला स्वास्थ्य कार्यालयका प्रमुख कृष्णबहादुर मिजारले जानकारी दिनुभयो ।

साथै, रुपन्देहीमा थप एकजनाको उपचारका क्रममा मृत्यु भएको छ ।

लुम्बिनी प्रादेशिक अस्पतालमा भर्ना भएका बुटवल उपमहानगरपालिका–५ का ६७ वर्षीय पुरुषको उपचारका क्रममा आज मध्याह्न साढे १२ बजे मृत्यु भएको हो ।