काठमाडौं । चितवनमा थप २६ जनामा कोरोना संक्रमण पुष्टि भएको छ। भरतपुर अस्पताल कोभिड १९ परीक्षण प्रयोगशालामा गय राति गरिएको परीक्षणमा चितवनका १५ सहित कूल २६ जनामा संक्रमण पुष्टि भएको थियो।

चितवनका १५ जना भरतपुर महानगरपालिकाका १४ र रत्ननगर नगरपालिकाका १ हुन्। भरतपुर महानगरपालिकाका १४ मध्ये ८ जना पुरुष छन् भने बाँकी संक्रमित महिला छन्।

संक्रमितहरूको उमेर ११ वर्षदेखि ५९ वर्षसम्म रहेको अस्पतालको विवरणमा उल्लेख छ। रत्ननगर नगरपालिकाकी संक्रमित भने वडा नं ८ की ५६ वर्षीया महिला हुन्। त्यसैगरी, मकवानपुरका १, गोरखाका दुई, नवलपुरका १ र सप्तरीका २ जनामा संक्रमण देखिएको छ।

त्यस्तै दैलेख, बारा र गुल्मीका एक–एक पुरुष तथा सुर्खेत र मोरङका एक–एक महिलामा पनि संक्रमण पुष्टि भएको प्रयोगशालाकी प्रमुख डा.नितु अधिकारीले जानकारी दिनुभयो ।

अस्पतालले हिजो २७५ वटा नमूनाको पीसीआर विधिबाट परीक्षण गरेको थियो । जसमा २४९ मा कोरोना परीक्षण नेगेटिभ देखिएको थियो ।