काठमाडौं । पुँजी बजारको सुधारको माग राख्दै आज सेयर बजारका लगानीकर्ताहरूले नेपाल स्टक एक्सचेन्ज (नेप्से) घेराउ गर्ने भएका छन् ।
आन्दोलनरत सेयर लगानीकर्ताहरुको संघर्ष समितिले आज दिउँसो ३ बजे सिंहदरबारस्थित नेप्से कार्यालयमा प्रदर्शन गर्ने भएका हुन् ।
सो अवसरमा संघर्ष समितिले नेप्सेका अध्यक्षलाई १९ बुँदे मागपत्रको पुनः ध्यानाकर्षण गराउने कार्यक्रम समेत रहेको संघर्ष समितिका संयोजक तिलक कोइरालाले जानकारी दिनुभयो ।
यसअघि नै संघर्ष समितिले सेयर बजारको सुधारका लागि १९ बुँदे मागपत्र पेस गरेपनि कुनै सुनुवाइ नभएको र सो मागको सरकारबाटै बेवास्ता भएकाले प्रदर्शनमा उत्रिनु परेको संयोजक कोइरालाको भनाइ छ ।
हाल सेयर लगानीकर्ताहरूले १९ बुँदे माग अगाडि सार्दै २५ सदस्यीय संघर्ष समिति गठन गरेर आन्दोलन गरिरहेका छन् । उनीहरुले सोमबार धितोपत्र बोर्डमा माग पत्र पेस गर्दै तत्काल निर्णय गर्न आग्रह गरेका थिए ।
सरोकारवालाहरूले आफ्ना माग सम्बोधन नगरे लगानीकर्ताहरूले असार १ गतेदेखि आमरण अनशन समेत थाल्ने चेतावनी दिएका छन् ।
